ডিব্ৰুগড় : ৰাজ্যত অনুষ্ঠিত হ'বলগা পঞ্চায়ত নিৰ্বাচনক লৈ শাসক বিৰোধী সকলো ৰাজনৈতিক দলৰে তৎপৰতা বৃদ্ধি পাইছে । শাসক দল বিজেপিয়ে মণ্ডল, জিলা আৰু ৰাজ্যিক পৰ্যায়লৈ নেতৃত্ব সাল-সলনি কৰি সাজু হৈছে পঞ্চায়ত নিৰ্বাচনৰ বাবে ।
মুখ্যমন্ত্ৰী হিমন্ত শৰ্মাই উচ্চতৰ মাধ্যমিক পৰীক্ষা শেষ হোৱাৰ লগে লগে ৰাজ্যত পঞ্চায়ত নিৰ্বাচনৰ অধিসূচনা বলৱৎ হ'ব বুলি ঘোষণা কৰা পাছতেই মূল বিৰোধী দল কংগ্ৰেছৰ লগতে আন ৰাজনৈতিক দলে সাংগঠনিক কাম-কাজ যুদ্ধকালীনভাৱে আৰম্ভ কৰিছে ।
ইয়াৰ মাজতে বুধবাৰে চৰাইদেউ জিলাৰ সোণাৰি নগৰৰ টীয়ক ৰজাবাৰীত অৱস্থিত ৰাজীৱ ভৱনত জিলা মহিলা কংগ্ৰেছৰ কৰ্মীসভাৰ আয়োজন কৰা হয় । এই সভাত অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে অংশগ্ৰহণ কৰি চৰাইদেউ জিলাখনৰ মহিলা কংগ্ৰেছৰ সাংগঠনিক কাম-কাজ বুজ লয় ।
সভাত অংশগ্ৰহণ কৰি অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে চৰাইদেউ জিলা মহিলা কংগ্ৰেছৰ সভাত অংশগ্ৰহণ কৰি ভাল লাগিল বুলি মন্তব্য কৰে । তেওঁ কয়, ‘‘যি ধৰণেৰে মহিলা সকলে সহযোগিতা কৰিছে এই শক্তিয়ে সমাগত পঞ্চায়ত নিৰ্বাচন আৰু ২৬ বিধানসভা নিৰ্বাচনত আমি ভাল ফলাফল দেখুৱাবলৈ সক্ষম হ’ম ।’’
- বিজেপিয়ে ধাৰৰ ওপৰত ধাৰ লৈ মহিলাক আঁচনি দিছে :
চৰাইদেউ জিলা মহিলা কংগ্ৰেছৰ সভাত অংশগ্ৰহণ কৰি শাসনাধীন চৰকাৰক তীব্ৰ সমালোচনা কৰে অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে । তেওঁ কয়, ‘‘আঁঠুৱা, কম্বল আৰু কম দামৰ বস্তু মহিলাক কংগ্ৰেছ চৰকাৰে দিছিল । কিন্তু আজিৰ তাৰিখত ধাৰৰ ওপৰত ধাৰ বৃদ্ধি কৰি বিজেপিয়ে আঁচনি দিছে । কংগ্ৰেছ দলৰ অৰ্থনৈতিক পৰিকল্পনা আছিল, সেয়ে কম দামৰ বস্তু দিয়াৰ লগতে মহিলাক আঁচনি দিছিল । মুখ্যমন্ত্ৰী হিমন্ত বিশ্ব শৰ্মাই আঁচনি দিছে ঠিকেই কিন্তু আঁচনি দিয়াৰ বিপৰীতে প্ৰতিটো সামগ্ৰীৰ মূল্যবৃদ্ধি কৰিছে ।’’
চৰাইদেউ জিলা মহিলা কংগ্ৰেছৰ সাংগঠনিক সভাত উপস্থিত হৈ সচাকৈয়ে আপ্লুত হলোঁ । মহিলাৰ সমাগমে মনত বহু সুখ দিলে । কংগ্ৰেছৰ কৰ্মীয়ে ২০২৬ লৈ ককালত টঙালি বান্ধিছে । #জয়কংগ্ৰেছ pic.twitter.com/6xanQpyEX7
— Mira Borthakur Goswami (@borthakur_mira) February 5, 2025
- এডভান্টেজ আছাম বাকী আৰু ফাঁকিৰ জুমলাবাজী :
‘‘ভাৰতবৰ্ষৰ উন্নত পাঁচখন ৰাজ্যৰ ভিতৰত অসমক গঢ়ি তুলিবলৈ চেষ্টা চলাইছে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই । অসমত যাতে দেশ-বিদেশৰ বিনিয়োগকাৰী সংস্থাই বিনিয়োগ কৰিবলৈ আগবঢ়ি আহে তাৰবাবে অসম চৰকাৰে এডভাণ্টেজ আছাম ২.০ সন্মিলন অনুষ্ঠিত কৰিবলৈ ব্যৱস্থাৰ গ্ৰহণ কৰিছে । ৰাজ্য চৰকাৰে এডভাণ্টেজ আছাম ২.০ সন্মিলন অনুষ্ঠিত কৰিব লোৱাত মুখ্যমন্ত্ৰীগৰাকীয়ে নিজেই দক্ষিণ কোৰিয়া আৰু জাপানৰ গৈ ব্যৱসায়ীসকলক এডভাণ্টেজ আছাম ২.০লৈ নিমন্ত্ৰণ কৰিছে । কিন্তু অসম চৰকাৰে অনুষ্ঠিত কৰিবলৈ লোৱা এডভাণ্টেজ আছাম মানেই বাকী আৰু ফাঁকি ৷’’ এই দাবী কৰিলে অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে । পূৰ্বে অনুষ্ঠিত হোৱা এডভাণ্টেজ আছামৰ ৰিপোৰ্ট প্ৰকাশ কৰাৰ আহ্বান চৰকাৰক ।
