তেজপুৰ,১৬ অক্টোবৰ: বিজ্ঞানৰ অগ্ৰগতিৰ লগে লগেই এতিয়া সম্ভৱ হৈ পৰিছে সকলো । এতিয়াৰ পৰা তেজপুৰৰ নিঃসন্তান লোকে সন্তান প্ৰাপ্তিৰ বাবে বাহিৰলৈ গৈ চিকিৎসা কৰাব নালাগে । তেজপুৰ চহৰতে কৰাব পাৰিব চিকিৎসা । প্ৰথমবাৰৰ বাবে তেজপুৰত আই ভি এফ চিকিৎসা পদ্ধতিৰে এটি শিশুৰ জন্ম হৈছে স্থানীয় চিকিৎসকৰ দ্বাৰা ।
চিকিৎসকৰ প্ৰচেষ্টাত তেজপুৰৰ ই এম এম মেম'ৰিয়েল নামৰ এখন ব্যক্তিগত চিকিৎসালয়ত নিজাকৈ থকা আই ভি এফ চেণ্টাৰত এই শিশুটিয়ে জন্ম লাভ কৰে । প্ৰসিদ্ধ স্ত্রী ৰোগ বিশেষজ্ঞ ডাঃ মনোজ মিৰ্ধা আৰু ডাঃ চেহনাজ পাৰভেজ আৰু ভ্ৰূণ বিজ্ঞানী ডাঃ অজয় বৰ্মনৰ তত্বাৱধানত এই শিশুটিয়ে সুস্থ শৰীৰে জন্ম লাভ কৰে ।
উত্তৰ অসমৰ প্ৰথমখন আই ভি এফ চিকিৎসা কেন্দ্ৰ ই এম এম নামৰ ব্যক্তিগত চিকিৎসালয়খন বিগত ২০২৩ বৰ্ষত স্থাপন কৰিছিল ডাঃ মনোজ মিৰ্ধাই । সম্পূৰ্ণ ৭ বছৰ বন্ধ্যাত্য দুৰ কৰি Precious Fertility & IVF Centre ত ডাঃ চেহনাজ পাৰভেজৰ চিকিৎসাত এই শিশুটিৰ জন্ম দিবলৈ সক্ষম হয় । ডাঃ চেহনাজ পাৰভেজে ভাৰতৰ প্ৰখ্যাত মিলান ফাৰটিলিটি চেণ্টাৰৰ পৰা প্ৰশিক্ষণ লাভ কৰিছে ।