লখিমপুৰ, ২ মে' : লখিমপুৰ লোকসভা সমষ্টিত এইবাৰ অসন্তুষ্ট ভোটাৰৰ সংখ্যা অধিক হোৱাৰ সম্ভাৱনা আছে । উল্লেখ্য যে বিগত ২০১৯ চনৰ সাধাৰণ নিৰ্বাচনত লখিমপুৰ সমষ্টিত পোন্ধৰ হেজাৰোধিক ভোটাৰে নোটাৰ বুটাম টিপিছিল ।
ৰাজ্যত এইবাৰ তিনিটা পৰ্যায়ত অনুষ্ঠিত হৈছে লোকসভা নিৰ্বাচনৰ ভোটগ্ৰহণ । এই নিৰ্বাচনৰ অন্তিম পৰ্যায়ৰ ভোটগ্রহণ অনুষ্ঠিত হ'বলৈ মাজত মাথোঁ দুদিনমান বাকী আছে । ইতিমধ্যে প্ৰথম আৰু দ্বিতীয় পৰ্যায়ত পাঁচটাকৈ মুঠ দহটা সমষ্টিত ভোটগ্রহণ সমাপ্ত হৈছে । অন্তিম পৰ্যায়ত চাৰিটা সমষ্টিত ভোটগ্ৰহণ অনুষ্ঠিত হ'ব ।
প্ৰথম পৰ্যায়ৰ ভোটগ্রহণ সমাপ্ত হোৱা সমষ্টিকেইটাৰ ভিতৰত অন্যতম হৈছে ১২ নং লখিমপুৰ লোকসভা সমষ্টি । সমষ্টিটোত এইবাৰ মুঠ ৯ গৰাকী প্রার্থীয়ে প্ৰতিদ্বন্দ্বিতা আগবঢ়াইছে । কংগ্রেছৰ উদয় শংকৰ হাজৰিকা, বিজেপিৰ প্ৰদান বৰুৱা, তৃণমূল কংগ্রেছৰ ঘনকান্ত চুতীয়া, চিপিআইৰ ধীৰেণ কছাৰী, এছইউচিআইৰ পল্লৱ পেগু, ভিপিআইৰ বীৰেণ বাইলুংআৰু নিৰ্দলীয় প্রার্থী গোবিন বিশ্বকৰ্মা, দেৱনাথ পাইট আৰু বিক্ৰম ৰামচিয়াৰী । এইসকল প্ৰাৰ্থীৰ ভাগ্য ইতিমধ্যে ষ্ট্ৰংৰূমত আবদ্ধ হৈ আছে ।
দলীয় অথবা নিৰ্দলীয় প্রার্থীসকলে নিজা কৌশলেৰে নিৰ্বাচনী যুঁজত জপিয়াই পৰি ভোটাৰক নিজৰ সপক্ষে আকৰ্ষিত কৰিবলৈ প্ৰস্তুতি চলাইছিল । পিচে প্রার্থীসকলৰ অংকত এইবাৰ অসন্তুষ্ট ভোটাৰে আউল লগোৱাৰ সম্ভাৱনা আছে । সমষ্টিটোত এইবাৰ অসন্তুষ্ট ভোটাৰৰ সংখ্যাধিক্য হোৱাৰ সম্ভাৱনা আছে । বিগত নিৰ্বাচনত তেনে এক প্ৰতিচ্ছবি প্ৰকাশ পাইছিল ৷
২০১৯-ৰ নিৰ্বাচনত লখিমপুৰ লোকসভা সমষ্টিত ১৫ হেজাৰ ২২০ জন ভোটাৰে এজনো প্রার্থীক পচন্দ নকৰি নোটাৰ বুটাম টিপিছিল । উক্ত নিৰ্বাচনত ১১ গৰাকী প্রার্থীয়ে প্ৰতিদ্বন্দ্বিতা কৰিছিল । কিন্তু পোন্ধৰ হেজাৰোধিক ভোটাৰে তাৰে ভিতৰত এজনো প্রার্থীক পচন্দ নকৰি নোটাৰ বুটাম টিপিছিল । সেই সময়ত সৰ্বাধিক নোটাৰ বুটাম টিপা ভোটাৰ আছিল ডুমডুমা বিধানসভা সমষ্টিত ।