গুৱাহাটী, ২৫ ছেপ্টেম্বৰ : ৰাজ্যত অভাৱনীয় তথা নজিৰবিহীনভাৱে বৃদ্ধি পাইছে উষ্ণতা । কঁহুৱা ফুলাৰ বতৰত এনে গৰম সাধাৰণতে কল্পনাৰ অগোচৰ । এক কথাত অসহনীয় গৰমে ৰাজ্যবাসীক ত্ৰাহি মধুসূদন সোঁৱৰাইছে । আনহাতে, উৎকট গৰমৰ মাজতে ভূতৰ ওপৰত দানহ পৰাদি ঘনে ঘনে হৈছে বিদ্যুৎ কর্তন । যিমানে গৰম বৃদ্ধি পাইছে সিমানেই ৰাজ্যখনত বিদ্যুৎ কর্তনো বৃদ্ধি পাবলৈ ধৰিছে ।
যেন শক্তিহীন হৈছে ৰাজ্যৰ শক্তি বিভাগ । ৰাজ্যৰ আন প্ৰান্তৰ কথা বাদেই ৰাজধানী চহৰ গুৱাহাটী মহানগৰীতেই সঘন লোডশ্বেডিং কৰা হৈছে । অথচ বিজেপি চৰকাৰে অসমত ২৪ ঘণ্টাই বিদ্যুৎ যোগান ধৰাৰ প্ৰতিশ্ৰুতি দিছিল । কিন্তু এতিয়া ২৪ ঘণ্টাত কিমানবাৰ বিদ্যুৎ কৰ্তন কৰে তাৰ কোনো হিচাপ নাই । বহু ঠাইত বিদ্যুৎ মাজে সময়েহে আহে ।
তাপমান বৃদ্ধিৰ লগে লগে বৃদ্ধি পাইছে বিদ্যুতৰ চাহিদা :
ৰাজ্যজুৰি প্ৰখৰ ৰ'দ আৰু উষ্ণতা বৃদ্ধিয়ে বিদ্যুতৰ চাহিদা বহু পৰিমাণে বৃদ্ধি কৰিছে । ৰাজ্যৰ বিদ্যুৎ যোগান ব্যৱস্থাটোৰ ইতিহাসত বিগত ২২ আগষ্টত চাহিদাৰ পৰিমাণ সৰ্বাধিক বৃদ্ধি হয় । কিন্তু সেই অভিলেখ অধিক দিন স্থায়ী নহ'ল । মাত্র আঠদিন পাছত অর্থাৎ ৩০ আগষ্টত সেই অভিলেখ ভংগ হয় । সেই অভিলেখ আকৌ ভংগ হয় যোৱা ২০ ছেপ্টেম্বৰত ।
বিদ্যুৎ উৎপাদন আৰু যোগানত অসম হ'ল দেশৰ অন্যতম পিছপৰা ৰাজ্য । গতিকে তাৰ ওপৰতে চাহিদা বৃদ্ধি অভিলেখ পৰিমাণ হোৱাত লোডশ্বেডিঙো বৃদ্ধি হয় । বিদ্যুৎ ক্ৰয়ৰ পুঁজি ৰাহি কৰিবলৈ বিশেষকৈ পুৱাৰ ভাগত অসম বিদ্যুৎ বিতৰণ কোম্পানী লিমিটেডে (এপিডিচিএল) ৰাজ্যজুৰি ন্যূনতম এঘণ্টাকৈ বিদ্যুৎ কর্তন কৰাটো যেন এক নিয়মত পৰিণত হৈছে । তাৰ পাছতো দিনটোৰ বিভিন্ন সময়ত বিদ্যুৎ কৰ্তন অব্যাহত ৰাখিছে ।
এ পি ডি চি এলৰ ইতিহাসত সৰ্বাধিক চাহিদা
গুৱাহাটীৰ পল্টনবজাৰস্থিত বিজুলী ভৱনৰ নাম প্ৰকাশত অনিচ্ছুক এগৰাকী বিষয়াই সদৰী কৰা মতে, বিগত ৩০ আগষ্টত বিদ্যুতৰ সৰ্বোচ্চ চাহিদাৰ পৰিমাণ ২,৬৪৫ মেগাৱাটলৈ বৃদ্ধি হৈছিল । চাহিদাৰ এই পৰিমাণ আছিল এ পি ডি চি এলৰ ইতিহাসত সৰ্বাধিক । চাহিদাৰ বিপৰীতে প্ৰতিষ্ঠানটোৱে সেই দিনা গ্ৰাহকক যোগান ধৰিবলৈ সক্ষম হোৱা বিদ্যুতৰ পৰিমাণ আছিল ২,৫৮০ মেগাৱাট । কিন্তু ৩০ আগষ্টৰ চাহিদাৰ অভিলেখ মাত্র ২০ দিনতে ভংগ হয় । যোৱা ২০ ছেপ্টেম্বৰত উৎকট গৰমৰ বাবে বিদ্যুতৰ চাহিদা বৃদ্ধি হয় ২,৮০৯ মেগাৱাটলৈ । এই চাহিদাৰ বিপৰীতে প্ৰতিষ্ঠানটোৱে যোগান ধৰিবলৈ সক্ষম হোৱা বিদ্যুতৰ পৰিমাণ আছিল ২,৬৮৪ মেগাৱাট ।
মাত্র এমাহৰ ভিতৰতে চলিত বৰ্ষত বিদ্যুতৰ চাহিদাক লৈ প্ৰথমটো অভিলেখ হৈছিল যোৱা ২২ আগষ্টত । সেইদিনা সৰ্বোচ্চ চাহিদাৰ পৰিমাণ বৃদ্ধি হৈছিল ২,৪০০ মেগাৱাটলৈ । চাহিদাৰ বিপৰীতে এ পি ডি চি এলে উপভোক্তাক যোগান ধৰিবলৈ সক্ষম হৈছিল ২,৩০০ মেগাৱাট । এনেদৰে মাত্ৰ ৩০ দিনৰ ভিতৰতে স্থাপন হয় তিনিটাকৈ অভিলেখ ।
চাহিদাৰ বিপৰীতে ৰাজ্যখনৰ নিজা উৎপাদন :
বিদ্যুৎ উৎপাদনৰ ক্ষেত্রত অসমৰ অৱস্থা একেবাৰে শোচনীয় । ৰাজ্যখনৰ বিদ্যুতৰ চাহিদা পূৰণ কৰিব নোৱাৰিলেও নিজা উৎপাদনৰ পৰিমাণ এই সময়ত একেবাৰে নিশকতীয়া । অথচ অসমত বিদ্যুৎ উৎপাদনৰ পৰিমাণ বৃদ্ধিৰ বাবে বছৰ বছৰ ধৰি প্ৰকল্প গ্রহণ কৰিয়েই আছে । ৰাজ্যৰ নিজা উৎপাদন প্রকল্পবোৰৰ ক্ষমতা হ'ল মাত্র ৪২০ মেগাৱাট । ইয়াৰে ৩০৭ মেগাৱাটহে উৎপাদন কৰি থকাটো সম্ভৱ হৈছে । অৱশ্যে উৎপাদনৰ এই পৰিমাণৰো ধাৰাবাহিকতা কেতিয়াও ৰক্ষা হোৱা নাই । উৎপাদনৰ বৃহৎ ঘাটি পূৰণ কৰিবলৈ ৰাজ্যখনে কমেও ২৯টা উৎপাদন উৎসৰ পৰা অতি উচ্চ দৰত নিয়মীয়াকৈ বিদ্যুৎ ক্ৰয় কৰি থাকিবলৈ বাধ্য হৈছে ।