গোলাঘাট, ২ জুন : ড্ৰাগছৰ বিৰুদ্ধে গোলাঘাট আৰু কাৰ্বি আংলং আৰক্ষীৰ আন এক বৃহৎ সফলতা । এক গোপন সুত্ৰৰ পম খেদি গোলাঘাটৰ অপৰাধ শাখাৰ অতিৰিক্ত আৰক্ষী অধীক্ষক জন দাসৰ নেতৃত্বত আৰু কাৰ্বি আংলং জিলা আৰক্ষীৰ সহযোগত গোলাঘাট জিলাৰ ৩৯ নং ৰাষ্ট্ৰীয় ঘাইপথৰ পংকিয়াল দৈগ্ৰোঙত এখন AS-01-BZ-0675 নম্বৰৰ ক্ৰেটা বাহনত তালাচী চলাই ৭০ টা চাবোনৰ বাকচত ৮৫০.৩৯ গ্ৰাম হেৰ'ইনসহ তিনিজন সৰবৰাহকাৰীক আটক কৰিবলৈ সক্ষম হয় ।
সৰবৰাহকাৰী কেইটা ক্ৰমে দিলৱাৰা হুছেইন, আলিমুদ্দিন বৰভূঞা, আলটাব হুছেইন বুলি জানিব পৰা গৈছে । সৰহবৰাকাৰী কেইটাই কাৰ্বি আংলং জিলাৰ কেইবাখনো আৰক্ষীৰ নাকা তালাচী অতি কৌশলেৰে পাৰ কৰাৰ পাছত এই গোলাঘাট আৰক্ষীক অৱগত কৰোৱাত গোলাঘাটৰ অপৰাধ শাখাৰ অতিৰিক্ত আৰক্ষী অধীক্ষক জন দাস আৰু কাৰ্বি আংলং আৰক্ষীৰ যৌথ অভিযানত জব্দ কৰিবলৈ সক্ষম হয় এই বৃহৎ পৰিমাণৰ হেৰ'ইনখিনি ।
বৰ্তমান আৰক্ষীয়ে আটকাধীন তিনি সৰবৰাহকাৰীক অধিক তথ্যৰ বাবে জেৰা অব্যাহত ৰাখিছে । উল্লেখযোগ্য যে গোলাঘাট জিলাক কৰিডৰ হিচাপে ব্যৱহাৰ কৰি একাংশ ড্ৰাগছ মাফিয়াই দৈনিক অব্যাহত ৰাখিছে ড্ৰাগছৰ সহবৰাহ । বিশেষকৈ চুবুৰীয়া ৰাজ্য মণিপুৰ, মেঘালয়, মিজোৰামৰ পৰা নাগালেণ্ডৰ ডিমাপুৰ দিশৰ পৰা অসম নাগালেণ্ড সীমান্তৰ বিভিন্ন অঞ্চলত অব্যাহত ৰাখিছে ড্ৰাগছৰ লগতে বিভিন্ন অবৈধ চোৰাং সামগ্ৰীৰ সহবৰাহ ।