গুৱাহাটী, ২০ জুলাই:ৰাজ্যত অব্যাহত আছে বাঘৰ আতংক ৷ নগাঁও, ডিব্ৰুগড়, বিশ্বনাথ, মাজুলীৰ পাচত এইবাৰ পুনৰ গুৱাহাটী মহানগৰীত বাঘে চলাইছে সন্ত্ৰাস । শনিবাৰৰ পুৱতি নিশা বাঘৰ আক্ৰমণত গুৰুতৰভাৱে আঘাতপ্ৰাপ্ত হয় এগৰাকী মহিলা । নাম দিপালী দাস (৪৫) ৷ মহানগৰীৰ কালাপাহাৰৰ পাহাৰতলী নামৰ অঞ্চলটোত সংঘটিত হয় এই ঘটনা । সম্প্ৰতি আহত মহিলাগৰাকী গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ আছে ।
লগতে পঢ়ক:ইন্দ্ৰপুৰৰ শিলৰ ফাঁকত আৱদ্ধ বাঘৰ পোৱালি - Tiger cub in Guwahati
শনিবাৰৰ পুৱতি নিশা প্ৰায় ২.৩০ বজাত বাঘৰ আক্ৰমণৰ সন্মুখীন হয় মহিলাগৰাকী । নিত্য নৈমিত্যিক কাৰ্যৰ বাবে নিশা বাহিৰলৈ অহাৰ সময়তে বাঘে মহিলাগৰাকীক আক্ৰমণ কৰে ৷ বাঘৰ আক্ৰমণত মহিলাগৰাকীৰ মুখমণ্ডল আৰু ডিঙিত গুৰুতৰভাৱে আঘাতপ্ৰাপ্ত হয় । উল্লেখ্য যে, দিনকদিনে মহানগৰীৰ জনবসতিপূর্ণ অঞ্চলত বৃদ্ধি পাইছে নাহৰফুটুকীৰ মুক্ত বিচৰণ । মূলতঃ খাদ্যৰ সন্ধানত ওলাই অহা বাঘে প্রায়ে গুৱাহাটীৰ কেইবাস্থানতো বিচৰণ কৰাৰ ফলত আতংকিত হৈ পৰিছে মহানগৰীৰ বাসিন্দাসকল ।