লখিমপুৰ, ১২ জুলাই :কেৱল নকল সোণ, জালনোট আদিৰ বাবেই নহয়, মাৰাত্মক বৰবিহ স্বৰূপ ড্ৰাগছৰো ৰম্যভূমিত পৰিণত হৈছে লখিমপুৰ জিলা । আৰক্ষীয়ে এনে বেহাৰ বিৰুদ্ধে শক্তিশালী ৰূপত বহু অভিযান চলাইছে ৷ আনকি আৰক্ষীয়ে এই ক্ষেত্ৰত বহু সফলতাও লাভ কৰিছে ৷ তথাপিও মাৰ যোৱা নাই এই অবৈধ বেহাবোৰ । কিন্তু আৰক্ষীৰ কঠোৰ স্থিতি আৰু ৰঙা চকুকো কেৰেপ নকৰি একাংশই চলাই গৈছে এই বৰবিহৰ বেহা ।
ইয়াৰ মাজতে বুধবাৰে নিশা লখিমপুৰ জিলাৰ হাৰমতীত আৰক্ষীয়ে বৃহৎ পৰিমাণৰ ড্ৰাগছসহ নগদ ধন জব্দ কৰিবলৈ সক্ষম হয় । বিৱৰণি অনুসৰি, গোপন সূত্ৰৰ পৰা এক বিশেষ তথ্য লাভ কৰিছিল হাৰমতী আৰক্ষীয়ে ৷ সেই তথ্যৰ আলমতে বুধবাৰে বিয়লি ভাগত লখিমপুৰ জিলাৰ হাৰমতী আৰক্ষী চকীৰ সহকাৰী উপ পৰিদৰ্শক সুনন্দ ডেকাৰ নেতৃত্বত আৰু লালুক আৰক্ষী থানাৰ চক্ৰ বিষয়াসহ আৰক্ষীৰ সহযোগত চলোৱা হয় এক অভিযান ।
লগতে পঢ়ক :আৰক্ষী থানাৰ সমীপতে জব্দ বৃহৎ পৰিমাণৰ ড্ৰাগছ : তিনিটা সৰবৰাহকাৰী আটক - Anti Drug Mission
তাৰ পাচত আৰক্ষীৰ দলটোৱে ড্ৰাগছ ব্যৱসায়ী জিতেন বিশ্বাসৰ ২ নং পাৰ্ব্বতীপুৰস্থিত বাসগৃহত অভিযান চলায় ৷ এই অভিযানৰ অন্তত আৰক্ষীয়ে ড্ৰাগছ আৰু নগদ ধনসহ ড্ৰাগছ ব্যৱসায়ী জিতেন বিশ্বাসৰ পত্নীক আটক কৰে ৷ জানিব পৰা মতে, আৰক্ষীৰ এই অভিযান কালত জিতেন বিশ্বাস ঘৰত নাছিল ৷ অৱশ্যে এই অভিযানৰ সময়ত আৰক্ষীয়ে ছটা চাবোনৰ বাকচত ভৰাই থোৱা ৪৮ টা ড্ৰাগছ ভৰ্তি কণ্টেনাৰ আৰু নগদ ৪৮ হাজাৰ ৮ শ টকা জব্দ কৰিবলৈ সক্ষম হয় ।