মুখ্যমন্ত্ৰী হ’বলৈ নাপায় কোনে কংগ্ৰেছৰ পৰা গুচি গৈছিল ?

ধেমাজিত বিৰোধী দলপতি দেৱব্ৰত শইকীয়া । মুখ্যমন্ত্ৰী হিমন্ত বিশ্ব শৰ্মাক তীব্ৰ সমালোচনা কৰে শইকীয়াই ।

ধেমাজি : শনিবাৰে অসম প্ৰদেশ কংগ্ৰেছ কমিটীৰ উদ্যেগত সোণোৱাল কছাৰী স্বায়ত্তশাসিত পৰিষদৰ সমন্বয় সমিতিৰ প্ৰথম সভা ধেমাজি স্বাগত হোটেলত অনুষ্ঠিত হয় । এই সভাতেই অসম বিধান সভাৰ বিৰোধী দলৰ দলপতি দেৱব্ৰত শইকীয়াকে ধৰি ভালেকেইগৰাকী দলীয় শীৰ্ষ বিষয়া কৰ্মীয়ে অংশগ্ৰহণ কৰে । সভাৰ পিছত সংবাদ মাধ্যমৰ আগত বিৰোধী দলপতিগৰাকীয়ে মুখ্যমন্ত্ৰী হিমন্ত বিশ্ব শৰ্মাক তীব্ৰ সমালোচনা কৰে ।

বিৰোধী দলপতিগৰাকীয়ে কয়, "অসমৰ মুখ্যমন্ত্ৰী হ’বলৈ নাপায় কংগ্ৰেছৰ পৰা গুচি গৈছিল তেওঁ আৰু অসমত ১ নম্বৰ নেতা হ’বলৈ কৰা প্ৰতিযোগিতাৰ বাবে অসমত ২০১১ চনৰ পৰা কংগ্ৰেছত বিসম্বাদ সৃষ্টি হৈছিল । আমাৰ দলত হাই কামাণ্ড বেচ পাৰ্টী । ৰাহুল গান্ধী, মল্লিকাজুন খাৰ্গেই যাকে নেতা হিচাপে বিবেচনা কৰে আমি তাক সকলোৱে মানি লোৱা দৰকাৰ ।"

গুৱাহাটীত ঘটনাৰ সম্পৰ্ক দেৱব্ৰত শইকীয়াই পুনৰ কয়, “ৰাজভৱনটোৱে ৰাজ্যপালৰ কাৰ্যালয় । তেওঁ তাত নাথাকিলে ডেপুটি কমিচনাৰ, চেক্ৰেটাৰী, জইন্ট চেক্ৰেটাৰী, কেৰেণী মহৰি চব থাকে । এইখিনিকে নকৰি জনগনৰ গাত লাঠী চাৰ্জ কৰা হ’ল । আমি প্ৰকৃততে গুলী খাবলৈ গৈছিলো নেকি ? আমি ৰাইজৰ কেইটামান দাবী উত্থাপন কৰিব গৈছিলো ।"

ইয়াৰোপৰি তেওঁ কয়, "অসমৰ বিধান সভাত যিখন আইন গৃহীত কৰিছিল সেইখন দুখীয়া খেতিয়কক মাটি দিবলৈ । ভূমি যাৰ মাটি তাৰ বুলি শৰৎ সিংহ ডাঙৰীয়াৰ দিনত ভূমি আইনত সেই কথা লিখা আছিল । কিন্তু এতিয়া খেতি কৰা মাটিত উদ্যেগ বহুৱাই দিলে । তাত থকা কাৰ্বি চাহ জনজাতি আদি ভূমিপুত্ৰসকলক বিজেপি চৰকাৰে উচ্ছেদ কৰিছে এই কথাখিনি পুনৰবাৰ ক'ব গৈছিলো । যিহেতু আদানীৰ কোম্পানী আমেৰিকাত দোষী সাব্য়স্ত হৈছে । সংবিধানখনত সকলো নাগৰিকৰে সুবিধা দিছে । এইবিলাক কথা কবলৈ যাওঁতে আমাক লাঠী চাৰ্জ, কন্দুৱা গেছ প্ৰয়োগ কৰি এজনক মাৰিছে । আমি ন্যায়িক তদন্ত বিচাৰিছো ।"

লগতে পঢ়ক:মহিলাৰ সুৰক্ষাৰ কথা বিজেপিৰ মুখত শোভা নাপায় : প্ৰদেশ কংগ্ৰেছ - APCC PRESS MEET