গুৱাহাটী,১৮ ছেপ্টেম্বৰ: ৰাভা হাছং স্বায়ত্তশাসিত পৰিষদৰ মুখ্য কাৰ্যবাহী সদস্য টংকেশ্বৰ ৰাভাৰ জাতিগত পৰিচয় কি ? তাকলৈ চলি অহা বিতৰ্কৰ মাজতে বুধবাৰে ইয়াৰ তদন্ত দাবী কৰিলে বিৰোধী দলপতি দেৱব্রত শইকীয়াই । দিছপুৰত এখন সংবাদমেল সম্বোধন কৰি বিৰোধী দলপতিগৰাকীয়ে এই সন্দৰ্ভত কয়, "ৰাভা হাছং স্বায়ত্তশাসিত পৰিষদৰ নিৰ্বাচন অনুষ্ঠিত নকৰি ইয়াৰ কাৰ্যকাল বৃদ্ধি কৰি থকা হৈছে । ইফালে পৰিষদখনৰ টংকেশ্বৰ ৰাভাৰ জাতিগত প্ৰমাণপত্র সন্দৰ্ভত বিতৰ্ক হৈছে তথা প্ৰশ্ন উত্থাপন হৈছে । টংকেশ্বৰ ৰাভা প্ৰকৃততে ওদালগুৰিৰ শৰণীয়া উপাধিৰ বুলি কোৱা হৈছে ।"
লগতে শইকীয়াই কয়, "তেওঁৰ পিতৃৰ উপাধি এন আৰ চিত শৰণীয়া বুলি আছে । মাটি-বাৰী শৰণীয়া নামতে আছে । শৰণীয়াসকল ট্ৰাইবেল নহয় বুলি ইতিমধ্যে গুৱাহাটী উচ্চ ন্যায়ালয়ে ৰায় দিছে । তাৰ পিচতো টংকেশ্বৰ ৰাভাক এনেদৰে দায়িত্ব দিয়াৰ বাবে ৰাইজৰ মাজত ক্ষোভৰ সৃষ্টি হৈছে । গতিকে মই ইয়াৰ এটা তদন্ত দাবী কৰিছো ।"
তেওঁ লগতে কয়, "কাৰণ এইটো এটা পৰিষদ । যাৰ বাবে মই অসম বিধানসভাৰ সকলো দলৰ ট্ৰাইবেল বিধায়কসকলক লৈ বিষয়টোৰ খৰচি মাৰি তদন্ত কৰা উচিত । ঘটনাটো প্ৰকৃততে কি সেইটো জনাৰ আমাৰ সকলোৰে অধিকাৰ আছে । যদি ভুৱা মানুহে ট্ৰাইবেলৰ নামত অধিকাৰ লৈ আছে তেন্তে সেইটো এটা গুৰুত্বপূৰ্ণ বিষয় । সেইবাবে সকলো দলৰ জনজাতীয় বিধায়কসকলক লৈ এখন কমিটী গঠন কৰি টংকেশ্বৰ ৰাভাৰ বিষয়টো নিষ্পত্তি কৰিব লাগে ।"