টেঙা আম এবাৰ-দুবাৰ বেচিব পাৰি, যদিও সদায় নোৱাৰি : দেৱব্ৰত শইকীয়া
গুৱাহাটী, ২৮ মাৰ্চ : যোৰহাটত সাংসদ গৌৰৱ গগৈ জয়ী হোৱাটো খাটাং। এই ভৱিষ্যদ্বাণী বিৰোধী দলপতি দেৱব্ৰত শইকীয়াৰ ।
বৃহস্পতিবাৰে সংবাদ মাধ্যমৰ আগত বিৰোধী দলপতি দেৱব্ৰত শইকীয়াই গৌৰৱ গগৈ জয়ী হোৱাৰ কাৰণ সন্দৰ্ভত কয় যে, যোৰহাটৰ মানুহৰ মাজত ক্ষোভ আছে । বিজেপিৰ বিৰুদ্ধে ৰাইজৰ যথেষ্ট ক্ষোভ আছে ৷ বিজেপি, মোদী আৰু হিমন্ত বিশ্ব শৰ্মাৰ গেৰান্টী বজাৰৰ টেঙা আমৰ নিচিনা ।
২০১৪ চনৰ গেৰান্টীৰ ১০ শতাংশ পূৰণ কৰিব নোৱৰা দলটোৰ নতুন গেৰান্টীৰ কি মূল্য আছে বুলি শইকীয়াই প্ৰশ্ন উত্থাপন কৰে ৷ আনহাতে কংগ্ৰেছ নেতাৰ দল আৰু পদবী ত্যাগ সন্দৰ্ভত তেওঁ কয় যে, কংগ্ৰেছৰ যিসকল নেতা, বিধায়কৰ ওপৰত খোদ বিজেপিয়ে দুৰ্নীতিৰ অভিযোগ উত্থাপন কৰিছিল আজি তেওঁলোককে বিজেপি দলত সুমুৱাই লৈছে। গতিকে বিজেপিৰ মুখত ভ্ৰষ্টাচাৰ, দুৰ্নীতিৰ কথা শোভা নাপায় । ৰাইজক সদায় প্ৰতাৰণা কৰিব নোৱাৰি ৷