নলবাৰী: নলবাৰীৰ পাগলাদিয়া ৰিজ'ৰ্টত বনভোজস্থলীত সংঘটিত মাৰপিটৰ ঘটনাক কেন্দ্ৰ কৰি অব্যাহত আছে তীব্ৰ চাঞ্চল্য । বিজেপি নেতা-কৰ্মীৰ মাজত সৃষ্টি হোৱা মাৰপিটৰ ঘটনাই বিজেপিৰ ভিতৰচ'ৰাতো সৃষ্টি হৈছে প্ৰতিক্ৰিয়া । এই সন্দৰ্ভত মঙলবাৰে নিজৰ মত প্ৰকাশ কৰে ৰাজ্যিক বিজেপিৰ সভাপতি ভৱেশ কলিতাই । পিছে সভাপতিগৰাকীয়ে বিষটোৰ সন্দৰ্ভত এক ব্যংগাত্মক প্ৰতিক্ৰিয়াহে প্ৰকাশ কৰা পৰিলক্ষিত হয় ।
সভাপতি কলিতাই সাংবাদিকৰ আগত কয়,"পিকনিক খাবলৈ নগ'লেই হ'ল । পিকনিকৰ ভোজটোতো বেলেগ ভোজ হৈ যায় । সেই ভোজটো বাৰন কৰি সুন্দৰভাৱে খাব লাগে । হাই-কাজিয়া হ'ব নালাগে । বেলেগকো আমনি কৰিব নালাগে আৰু নিজে সুন্দৰকৈ বনত খাওঁক । বনত খোৱাতকৈ ঘৰত খোৱাতো বেছি ভাল ।"এনেদৰে গা এৰা মন্তব্য আগবঢ়াই ভৱেশ কলিতাই ।
উল্লেখ্য যে, দেওবাৰে লগে-ভাগে এসাঁজ খোৱাৰ উদ্দেশ্যে নলবাৰীৰ পাগলাদিয়া ৰিজ'ৰ্টত নলবাৰী বিজেপি টাউন মণ্ডলে আয়োজন কৰিছিল প্ৰীতিভোজ তথা বনভোজৰ । কিন্তু বনভোজৰ মাজতে হঠাৎ দিনৰ ভাগত বিজেপিৰ দুটা ফৈদৰ মাজত সৃষ্টি হয় প্ৰচণ্ড অৰিয়া-অৰিৰ । এক যুদ্ধসদৃশ পৰিৱেশৰ সৃষ্টি হয় নলবাৰীৰ পাগলাদিয়া ৰিজ'ৰ্টত ।