যোৰহাট, 25 মে’ :"মাটিৰ লগত কাৰো ক’তো সম্পৰ্ক-চম্পৰ্ক নাই ৷ এনে ওপৰতে আহে, পইচাকেইটামান ছটিয়াই দিয়ে, হিন্দ-মুছলমানৰ কথা কৈ ভোট লৈ গুছি যায় ৷ পাছত পুৰা পাঁচ বছৰ মস্তি কৰা ৷ আমি যদি কেতিয়াবা সঁচাকৈ ক্ষমতালৈ আহো আমি পাঁচ বছৰত পাঁচটা কাম কৰিম ৷ সকলো পথাৰতে পাঁচ বছৰ ভিতৰত পানী যোগানৰ ব্যৱস্থা কৰাটো আমাৰ প্ৰথম কৰণীয় ৷’’ যোৰহাটত অনুষ্ঠিত এক যোগদান কাৰ্যসূচীত অংশগ্ৰহণ কৰি দলটোৰ হাতলৈ ক্ষমতা আহিলে দলটোৰ লক্ষ্য আৰু পৰিকল্পনা উপস্থিত ৰাইজৰ আগত প্ৰকাশ কৰে ৰাইজৰ দলৰ বিধায়ক অখিল গগৈয়ে ৷
‘‘দ্বিতীয়তে উৎপাদিত সকলো সামগ্ৰীৰ উচিত দাম দিয়া ৷ তৃতীয়তে ফুটপাথৰ পৰা মলটো পৰ্যন্ত অসমীয়াৰ হাতত ৰাখিবৰ বাবে ব্যৱস্থা গ্ৰহণ কৰা ৷ অসমত উৎপাদিত বস্তুবিলাকেৰে পৃথিৱীৰ বজাৰ দখল কৰাটো আমাৰ হ’ব চতুৰ্থ লক্ষ্য আৰু গাঁৱে গাঁৱে উদ্যোগ স্থাপন কৰাটো আমাৰ বাবে হ’ব পঞ্চম কৰণীয় ৷" বিধায়ক গগৈয়ে কয় ৷
একেটা অনুষ্ঠানতে ৰাইজৰ দলৰ সভাপতিগৰাকীয়ে কংগ্ৰেছ আৰু বিজেপি দুয়োটা দলকে কঠোৰ ভাষাৰে সমালোচনা কৰে ৷ দুয়োখন চৰকাৰে বিগত সময়ত গ্ৰহণ কৰি অহা উন্নয়ন আৰু আঁচনিৰ প্ৰসংগত ক্ষুৰধাৰ সমালোচনা কৰে বিধায়ক গগৈয়ে ৷