ডিব্ৰুগড়, ১৯ ছেপ্টেম্বৰ: মুখ্যমন্ত্ৰী ড৹ হিমন্ত বিশ্ব শৰ্মাই ৰাজ্যৰ পৰা অনলাইন ট্ৰেডিঙৰ প্ৰৱঞ্চনা নোহোৱা কৰিবলৈ কঠোৰ নিৰ্দেশ দিয়াৰ পিচতে তৎপৰ হৈছে আৰক্ষী ৷ গুৱাহাটী, ডিব্ৰুগড়ৰ লগতে ৰাজ্যৰ বিভিন্ন স্থানৰ পৰা আটক কৰা হৈছে কেবাজনো অনলাইন ট্ৰেডিঙৰ নামত কোটি কোটি তথা সংগ্ৰহ কৰি প্ৰৱঞ্চনাৰ অভিযুক্তক ।
মুখ্যমন্ত্ৰীৰ কঠোৰ নিৰ্দেশত ডিব্ৰুগড় সদৰ আৰক্ষীয়ে গ্ৰেপ্তাৰ কৰিছিল অনলাইন ট্ৰেডিঙৰ নামত প্ৰৱঞ্চনাৰ অভিযুক্ত ২২ বছৰীয়া বিশাল ফুকনক ৷ তাৰ পিচতে Trading FX নামৰ অনলাইন মানি ট্ৰেডিং কোম্পানীৰ বিৰুদ্ধে উত্থাপিত প্ৰৱঞ্চনাৰ অভিযোগৰ সন্দৰ্ভত নিজাকৈ গোচৰ ৰুজু কৰি তদন্ত অব্যাহত ৰাখিছে আৰক্ষীয়ে ৷ ইতিমধ্যে Trading FX নামৰ অনলাইন মানি ট্ৰেডিঙৰ অসমৰ দায়িত্বত থকা ৰঞ্জিত কাকতিক যোৱা ৩ ছেপ্টেম্বৰৰ নিশা গ্ৰেপ্তাৰ কৰি জে’ললৈ প্ৰেৰণ কৰিছিল ।
বৃহস্পতিবাৰে আদালতত হাজিৰ কৰোৱা হয় অনলাইন ট্ৰেডিঙৰ নামত কোটি কোটি টকা সংগ্ৰহ কৰি কেবা হাজাৰ লোকক প্ৰৱঞ্চনা বুলি অভিযোগ উত্থাপন হোৱা ৰঞ্জিত কাকতিক । বৃহস্পতিবাৰে আবেলি আদালতত হাজিৰ কৰোৱা ৰঞ্জিত কাকতিৰ জামিনৰ বাবে আবেদন কৰিছিল অধিবক্তাই । সন্ধিয়াপৰ্যন্ত আদালতে সমগ্ৰ বিষয়ত পৰ্যালোচনা কৰাৰ অন্তত ৰঞ্জিত কাকতিৰ জামিন আবেদন নাকচ কৰে । ডিব্ৰুগড় জিলা সত্ৰ ন্যায়াধীশ আদালতে নাকচ কৰে এই আবেদন ৷
উল্লেখ্য যে বৃহস্পতিবাৰে দিনৰ ভাগত ৰঞ্জিত কাকতিয়ে জামিন লাভ কৰা বুলি সংবাদ মাধ্যমত বাতৰি প্ৰকাশ হোৱা পিচতে তীব্ৰ প্ৰতিক্ৰিয়াৰ সৃষ্টি হৈছিল । পৰৱৰ্তী সময়ত আদালতে জামিন আবেদন নাকচ কৰা বুলি জানিব পৰা যায় ৷