যোৰহাট :আঘোণ মানেই শস্য-সম্ভৱা সোণোৱালী পথাৰ ৷ আঘোণ মানেই সোণগুটি চপোৱাৰ বতৰ । কেৱল সোণালী ৰঙেৰে উদ্ভাসিত হৈ পৰিছে অসমৰ আঘোণৰ পথাৰ । আঘোণৰ ভৰপূৰ পথাৰত চৌদিশে সোণগুটি চপোৱাত ব্যস্ত হৈ পৰিছে চহা কৃষক-দাৱনী । আনফালে আকৌ বহু গাঁৱৰ ৰাইজে ধান চপাই নতুন ধানেৰে ন-খোৱাত ব্যস্ত হৈ পৰা পৰিলক্ষিত হৈছে ৷
অৱশ্যে আধুনিকতাৰ ধামখুমীয়াত ক্ৰমাৎ গ্ৰাম্য সমাজৰ পৰা হেৰাই যোৱাৰ উপক্ৰম হৈছে এই ন-খোৱা পৰ্ব ৷ হাঁহে-মাহে নতুন ধানৰ চাউলেৰে সকলোৱে একেলগে এসাঁজ খোৱাৰ আমেজেই কিছু সুকীয়া ৷ কিন্তু আজি নৱ প্ৰজন্মৰ বহু সংখ্যকে পিছে নাজানে ন-খোৱা উৎসৱনো কি ?
সেয়ে বৰ্মানৰ নৱপ্ৰজন্ম তথা ছাত্ৰ-ছাত্ৰীক ন-খোৱা উৎসৱনো কি, সেই বিষয়ে চিনাকী কৰাই দিয়া মানসেৰে আৰু অসমীয়া সমাজৰ পৰম্পৰা ৰক্ষা কৰাৰ বাবেই যোৰহাটৰ এখন শিক্ষানুষ্ঠানে গ্ৰহণ কৰিলে বিশেষ পদক্ষেপ । এই বিদ্যালয়খন হৈছে যোৰহাটৰ চিনামৰা জাতীয় বিদ্যালয় ।
বিদ্যালয়খনৰ শিক্ষক সমাজ, ছাত্ৰ-ছাত্ৰীসকলে একগোট হৈ বিদ্যালয়তে আয়োজন কৰিছে ন-খোৱা উৎসৱৰ । ন-খোৱা উৎসৱ আয়োজনেৰে পৰম্পৰা ধৰি ৰখাৰ চেষ্টা বিদ্যালয়খনৰ কৰ্তৃপক্ষৰ । ইফালে ন-চাউলেৰে হাঁহে-মাহে এসাঁজ খাই আনন্দত আত্মহাৰা হৈ পৰিছে ছাত্ৰ-ছাত্ৰীসকলো ।