গুৱাহাটী,৪ ছেপ্টেম্বৰ : ৰাজ্যৰ বিভিন্ন প্ৰান্তত বিশাল সম্পত্তি আৰু যথেষ্ঠ সম্ভাৱনীয়তা থকাৰ পাছতো চৰকাৰৰ সদিচ্ছা আৰু উপযুক্ত ব্যৱস্থাপনাৰ অভাৱতে ব্যাপক লোকচানৰ সন্মুখীন হ'বলগীয়া হৈছে অসম ৰাজ্যিক পৰিবহণ নিগম । এককথাত অভাৱনীয় সংকটৰ মাজত আছে অসমবাসীৰ আবেগ-অনুভূতি জড়িত হৈ থকা এই ৰাজহুৱা খণ্ডৰ প্ৰতিষ্ঠানটো । দুর্বল ব্যৱস্থাপনাকে ধৰি বিভিন্ন কাৰণত বছৰৰ পাছত বছৰ ধৰি আয়তকৈ ব্যয়ৰ পৰিমাণ বৃদ্ধি হৈ অসম ৰাজ্যিক পৰিবহণ নিগমৰ লোকচান এতিয়া আকাশচুম্বী হৈ পৰিছে ।
২০১৬ চনৰ পৰা এতিয়ালৈ অসম ৰাজ্যিক পৰিবহণ নিগমত হোৱা লোকচান পৰিমাণ হৈছে ৬০৩.৩১ কোটি টকা । বিধানসভাৰ সদ্যসমাপ্ত অধিৱেশনত উন্মোচিত হৈছে এই তথ্য । কংগ্ৰেছৰ বিধায়ক ৰেকিবুদ্দিন আহমেদে উত্থাপন কৰা লিখিত প্ৰশ্নৰ উত্তৰত পৰিবহণ মন্ত্ৰী কেশৱ মহন্তই সদনত দাঙি ধৰা তথ্যই উন্মোচিত কৰিছে পৰিবহণ নিগমৰ শোচনীয় অৱস্থাটো ।
কিমান বাহন কি অৱস্থাত আছে পৰিবহণ নিগমৰ:
বিধানসভাত চৰকাৰীভাৱে দিয়া তথ্য অনুসৰি অসম ৰাজ্যিক পৰিবহণ নিগমত বর্তমান ৬৪৬ খন নিজস্ব বাহন চলি আছে । আনহাতে ৪৮৬ খন বাছ বর্তমান পথত চলিব পৰা অৱস্থাত নাই । ইয়াৰ ভিতৰত মেৰামতি সম্ভৱ হোৱা বাছৰ সংখ্যা ৮৮ খন আৰু মেৰামতি সম্ভৱ নোহোৱা বাছৰ সংখ্যা ১৭২ খন । আনহাতে মেৰামতি সম্ভৱ নোহোৱা এই ১৭২ খন বাছ পৰিবহণ নিগমে নিৰ্ধাৰিত নীতিৰ জৰিয়তে নিলামৰ ব্যৱস্থা কৰি আছে । সেইদৰে অচল হৈ থকা ২২৬ বাছ নিবিদাৰ জৰিয়তে লীজত দিবলৈ ব্যৱস্থা কৰি আছে পৰিবহণ নিগমে ।
পৰিবহণ নিগমৰ কৰ্মচাৰীৰ সংখ্যা আৰু দৰমহাৰ ব্যয়:
অসম ৰাজ্যিক পৰিবহণ নিগমৰ মুঠ কৰ্মচাৰীৰ সংখ্যা হৈছে ১,৮০৩ জন । কৰ্মচাৰীসকলৰ দৰমহাৰ নামত মাহে ব্যয় হয় ৪৪৪.৪৮ লাখ টকা । আনহাতে লোকচানৰ পৰা হাত সাৰিবলৈ কৰ্মচাৰীসকলক ভি আৰ এছ দিয়াৰো ব্যৱস্থা কৰিছে নিগমে । ২০২৩ চনত ১৭০ গৰাকী আৰু ২০২৪ চনত ৮৩ গৰাকী কৰ্মচাৰীক ভি আৰ এছ দিয়া হৈছে ।
নিগমৰ অন্য আয়ৰ উৎস:
ৰাজ্যৰ প্ৰায়বোৰ চহৰতে পৰিবহণ নিগমৰ বহু মূল্যৱান সম্পদ আছে । বিধানসভাত দিয়া তথ্য অনুসৰি নিগমৰ কোনো ভূমি লীজত দিয়া হোৱা নাই । অনুজ্ঞাপত্ৰৰ ভিত্তিত ব্যৱসায়িকভাৱে মুঠ ১,৫০৯ খন সৰু-বৰ প্ৰতিষ্ঠান ব্যক্তিক অনুমতি প্রদান কৰা হৈছে । ইয়াৰ বাবদ নিগমে মাহেকত ৫৫ লাখ টকা সংগ্ৰহ কৰে ।
পৰিবহণ নিগমৰ প্রতিখন জিলাৰ মুখ্য স্থানত যথেষ্ট সম্পত্তি আছে যদিও নিগমৰ পৰিস্থিতি অতি শোচনীয় । পৰিবহণ নিগমক স্বচ্ছল কৰি তোলাৰ যথেষ্ট সম্ভাৱনীয়তা থকাৰ পাচতো কোনো উদ্যোগ গ্ৰহণ কৰা হোৱা নাই । বিশাল সম্পত্তিক কিদৰে উৎপাদক্ষম কৰি ব্যৱহাৰ কৰিব পাৰি তাৰ কোনো পৰিকল্পনা নাই ।
বিজেপি চৰকাৰৰ আমোলত নিগমৰ আয়-ব্যয় আৰু লোকচান :
বিজেপি চৰকাৰৰ আমোলত ২০১৬-১৭ বিত্তীয় বৰ্ষৰ পৰা ২০২২-২৩ বিত্তীয় বৰ্ষলৈকে পৰিবহণ নিগমৰ আয় হৈছে মুঠ ৮১৩৮২.২৮ লাখ টকা । ইয়াৰ বিপৰীতে এই সময়ছোৱাত ব্যয় হৈছে ১৪১৭১২.৮৫ লাখ টকা । অর্থাৎ নিগমৰ লোকচানৰ পৰিমাণ হৈছে ৬০৩৩০.৫৭ লাখ টকা । বিধানসভাৰ তথ্য অনুসৰি বছৰ অনুসৰি লোকচানৰ পৰিমাণ হৈছে ২০১৬-১৭ বিত্তীয় বৰ্ষত ৭৭৮৬.৫৭ লাখ টকা, ২০১৭-১৮ বিত্তীয় বৰ্ষত ৫৩৭৪.৯৫ লাখ টকা , ২০১৮-১৯ বিত্তীয় বৰ্ষত ১০১৩২.৫১৭ লাখ টকা, ২০১৯-২০ বিত্তীয় বৰ্ষত ৯৭৮১.৯০ লাখ টকা, ২০২০-২১ বিত্তীয় বৰ্ষত৮২৬৩.৮৯ লাখ টকা, ২০২১-২২ বিত্তীয় বৰ্ষত ১০,৬৫৩ লাখ টকা আৰু ২০২২-২৩ বিত্তীয় বৰ্ষত ৮৩৩৭.৩০ লাখ টকা । অৰ্থাৎ প্ৰত্যেক বছৰেই নিগমে কেৱল লোকচানৰ মুখ দেখি আহিছে ।