তালাচীৰ সময়তে কিয় কৰা নাছিল শ্লীলতা হানিৰ অভিযোগ ? ক’লে নলবাৰীৰ অভিযোগকাৰীয়ে - ADRE 2024

Modesty loss allegation by examinees in Nalbari : নলবাৰীৰ পৰীক্ষা কেন্দ্ৰত মহিলাৰ শ্লীনতা হানি কৰা তালাচীৰ অভিযোগ উত্থাপন কৰিছিল এগৰাকী যুৱতীয়ে ৷ তাৰ পিচতে তৎপৰ হ’ল অসম আৰক্ষী ৷ সোমবাৰে নলবাৰীত তদন্তৰ বাবে উপস্থিত হ’ল ডি আই জি ইন্দ্ৰানী বৰুৱা ৷

নলবাৰী, ১৬ ছেপ্টেম্বৰ :দেওবাৰে হৈ যোৱাADREত তালাচীৰ নামত মহিলা পৰীক্ষাৰ্থীক শাৰীৰিকভাৱে অপদস্থ কৰাৰ অভিযোগে বিশেষ চৰ্চা লাভ কৰিছে সমগ্ৰ ৰাজ্যত ৷ গোপনীয়তা ভংগ কৰি, নাৰীৰ সন্মানত আঘাত হানি তালাচী চলোৱা বুলি নলবাৰীৰ এগৰাকী যুৱতীয়ে সামাজিক মাধ্যমযোগে অভিযোগ উত্থাপন কৰাৰ পিচতে তৎপৰ হৈ পৰিল অসম আৰক্ষী ৷

উক্ত অভিযোগৰ ভিত্তিত অসম আৰক্ষীৰ সঞ্চালক প্ৰধানে দেওবাৰে নিশাই তদন্তৰ নিৰ্দেশ দিয়াৰ পিচত সোমবাৰে নলবাৰীত উপস্থিত হয় অসম আৰক্ষীৰ মধ্য আৰু পশ্চিম ৰেঞ্জৰ ডি আই জি ইন্দ্ৰানী বৰুৱা ৷ নলবাৰীৰ আৰক্ষী চাউনি অতিথিশালাত উপস্থিত হৈ আৰক্ষী বিষয়াগৰাকীয়ে সাক্ষ্য গ্ৰহণ কৰে অভিযোগ উত্থাপন কৰা পৰীক্ষাৰ্থীগৰাকীৰ ৷

উল্লেখ্য যে নলবাৰীৰ যুৱতী পৰীক্ষাৰ্থীগৰাকীয়ে ফেচবুকযোগে অভিযোগ উত্থাপন কৰিছিল যে তালাচীৰ নামত অন্তৰ্বাসপৰ্যন্ত খুলিছিল আৰক্ষীয়ে ৷ তদুপৰি শৰীৰৰ ভিন্ন অংগ স্পৰ্শ কৰি তালাচী চলোৱাৰ অভিযোগো উত্থাপন কৰিছিল যুৱতী পৰীক্ষাৰ্থীগৰাকীয়ে ৷ তাৰ পিচতে আৰক্ষী সঞ্চালক জি পি সিঙে সমগ্ৰ ঘটনাৰ সন্দৰ্ভত তাৎক্ষণিকভাৱে তদন্তৰ নিৰ্দেশ দিয়ে ৷ আৰক্ষী সঞ্চালক প্ৰধানৰ নিৰ্দেশৰ পিছত দেওবাৰে নলবাৰীত ডি আই জিগৰাকী উপস্থিত হয় আৰু সোধা-পোছা কৰে অভিযোগকাৰী পৰীক্ষাৰ্থীগৰাকীৰ লগতে অভিযুক্ত মহিলা আৰক্ষী কনিষ্টবলক ৷

তাৎক্ষণিকভাৱে তদন্ত আৰম্ভ কৰাৰ বাবে অভিযোগকাৰী পৰীক্ষাৰ্থীগৰাকীয়ে মুখ্যমন্ত্ৰী আৰু আৰক্ষী সঞ্চালক প্ৰধানগৰাকীক ধন্যবাদ জনায় ৷ তেওঁ কয়, ‘‘এই সন্দৰ্ভত মই মাত দিলোঁ, তাৰ পিচতে সকলোৱে মাতিছে ৷ মহিলাৰ বাবে নতুনকৈ এছ অ’ পি এখন আহিব বুলি মুখ্যমন্ত্ৰীয়ে কৈছে ৷ আমাৰ বাবে সেয়াই যথেষ্ট ৷ পুনৰ যাতে এনেকুৱা নহয়, আকৌ পৰীক্ষা আহি আছে ৷ তালাচীৰ প্ৰক্ৰিয়াটোক লৈ মোৰ অভিযোগ আছিল ৷ অসম পুলিচৰ ওপৰত মোৰ বিশ্বাস আছে ৷’’

এই সন্দৰ্ভত ডি আই জি ইন্দ্ৰানী বৰুৱাই কয়, ‘‘সেই নিৰ্দিষ্ট কেন্দ্ৰটোত দুগৰাকীৰ বাদে বাকী সকলো মহিলা পৰীক্ষাৰ্থী আছিল ৷ সম্পূৰ্ণ বন্ধ কোঠাৰ ভিতৰত তালাচী চলোৱা হৈছিল ৷ যিসকলে তালাচী কৰিছিল, তেওঁলোকক সোধা-পোছা কৰিলোঁ ৷ যাৰ বিৰুদ্ধে অভিযোগ আহিছে, তেওঁ 19-20 বছৰে চাকৰি কৰি আছে ৷ তেওঁৰ বাবে এইটোৱেই প্ৰথম পৰীক্ষা নহয় ৷ অভিযোগটো আমি গুৰুত্ব সহকাৰে লৈছোঁ ৷’’

লগতে পঢ়ক :ADRE ৰ পৰীক্ষাত মহিলা প্ৰাৰ্থীক তালাচী চলোৱাৰ ক্ষেত্ৰত প্ৰস্তুত হ’ব SOP; মুখ্যমন্ত্ৰীৰ ঘোষণা