ৰাজ্য চৰকাৰে দিব আছুতীয়াকৈ গণিত শিক্ষকৰ নিযুক্তি

ৰাজ্যত শীঘ্ৰে হ'ব নতুন শিক্ষকৰ নিযুক্তি । এইবাৰ গণিতৰ শিক্ষক আছুতীয়াকৈ নিযুক্তি দিব চৰকাৰে ।

ধেমাজি : অসমৰ শিক্ষিত নিবনুৱা যুৱক-যুৱতীৰ বাবে ভাল খবৰ । ৰাজ্যত পুনৰ শিক্ষক নিযুক্তি প্ৰক্ৰিয়া আৰম্ভ হ'ব । প্ৰায় ৫ হাজাৰ শিক্ষক নিযুক্তিৰ পৰিকল্পনা কৰিছে ৰাজ্য চৰকাৰে । শিক্ষা মন্ত্ৰী ডাঃ ৰণোজ পেগুৱে এই কথা ঘোষণা কৰে ।

আছুতীয়াকৈ গণিতৰ শিক্ষক নিযুক্তি

ধেমাজিত এক অনুষ্ঠানত অংশগ্ৰহণ কৰি শিক্ষা মন্ত্ৰী ডাঃ ৰণোজ পেগুৱে কয় যে ৰাজ্যত প্ৰথমবাৰৰ বাবে আছুতীয়াকৈ গণিতৰ শিক্ষক নিযুক্তি দিব চৰকাৰে ৷ গুণগত শিক্ষাক আৰু উন্নত কৰিব বুলি চৰকাৰে আশা কৰিছে । ধেমাজি উচ্চতৰ মাধ্যমিক বিদ্যালয়ত উপস্থিত হৈ ৰাইজক উদ্দেশ্যি মন্ত্ৰীগৰাকীয়ে কয়,"অহা বিত্তীয় বৰ্ষত আমি আছুতীয়াকৈ গণিতৰ শিক্ষক নিযুক্তি দিয়াৰ পৰিকল্পনা কৰিছো । ই আমাৰ গুণগত শিক্ষাক আৰু অধিক উন্নত কৰিব বুলি আশা কৰিছো ।"

৫ হাজাৰ নতুন শিক্ষকৰ নিযুক্তি

শিক্ষা মন্ত্ৰীগৰাকীয়ে লগতে কয় যে অহা মে' মাহৰ ভিতৰত মাধ্যমিক খণ্ডত ৰাজ্যত প্ৰায় ৯ হাজাৰ শিক্ষক-শিক্ষয়িত্ৰী নিযুক্তি দিবলৈ প্ৰস্তুতি চলোৱা হৈছে ৷ সেইদৰে ইয়াৰ পিছৰ বিত্তীয় বৰ্ষতে পুনৰ ৰাজ্যত প্ৰথম পৰ্যায়ত ৫ হাজাৰ শিক্ষক-শিক্ষয়িত্ৰী নিযুক্তি দি শিক্ষক নাটনিৰ সমস্যা দূৰ কৰিব আৰু ইয়াৰ বাবে ৰাজকোষৰ যথেষ্ট পুঁজিৰো প্ৰয়োজন হ'ব ।

উল্লেখ্য যে ৰাজ্যত অসমীয়া মাধ্যমৰ শিক্ষাখণ্ডত গুণগত শিক্ষাৰ বাবে চৰকাৰে কোটি কোটি টকা ব্যয় কৰি শিক্ষক নিযুক্তিকে ধৰি বিভিন্ন পদক্ষেপ গ্ৰহণ কৰিছে । কিন্তু তাৰ পিছতো চৰকাৰী বিদ্যালয়সমূহত ক্ৰমান্বয়ে ছাত্ৰ-ছাত্ৰীৰ সংখ্যা কমি আহিছে । ইয়াৰ বিপৰীতে ব্যক্তিগত খণ্ডলৈ যোৱাৰ প্ৰৱণতাও বৃদ্ধি পাই আহিছে । ৰাজ্যৰ বহু চৰকাৰী শিক্ষকে নিজৰ সন্তানক অসমীয়া মাধ্যমত নপঢ়ুৱায় ।

অভিযোগ অনুসৰি কেৱল দৰমহাৰ বাবেই চাকৰি কৰি থকাৰ ফলত বিদ্যালয়সমূহত ফলাফলো সন্তোষজনক নহয় । এনে পৰিস্থিতিত কেৱল ৰাজকোষৰ ধন ব্যয় কৰি হাজাৰ হাজাৰ শিক্ষক নিযুক্তি দি থাকিলেই চৰকাৰৰ দায়িত্ব শেষ নেকি বুলি সচেতন মহলে প্ৰশ্ন উত্থাপন কৰিছে ৷ নিযুক্তিৰ সমান্তৰালকৈ চৰকাৰী বিদ্যালয়ত শিক্ষাৰ গুণগত মান উন্নত কৰাৰ বাবে পদক্ষেপ ল'বলৈ চৰকাৰক আহ্বান জনাইছে সচেতন সমাজে ।

লগতে পঢ়ক :পৰম্পৰাগত হস্তীপূজাৰে কাজিৰঙাত আৰম্ভ হাতী ছাফাৰী