গুৱাহাটী,১৩ অক্টোবৰ : পূজা লাগিছে মুখ্যমন্ত্ৰী ড৹ হিমন্ত বিশ্ব শৰ্মাৰ । ষষ্ঠীৰ পৰাই মুখ্যমন্ত্রীয়ে আৰম্ভ কৰিছে পূজা চোৱা পৰ্ব । ৪ দিনত মুখ্যমন্ত্রীয়ে ৬০ খনৰো অধিক পূজাস্থলী দৰ্শন কৰিছে । এখনৰ পাচত আনখনকৈ পূজা মণ্ডপত উপস্থিত হৈ মুখ্যমন্ত্রীয়ে আশীৰ্বাদ লৈছে দুৰ্গতিনাশিনী দেৱী দুৰ্গাৰ । শনিবাৰেও মুখ্যমন্ত্রীয়ে গুৱাহাটী মহানগৰীত ৯ খনকৈ পূজাস্থলী দৰ্শন কৰে ।
দুৰ্গা পূজাৰ বিজয়া দশমীৰ দিনটোত সাৰ্বজনীন গুৱাহাটী বিশ্ববিদ্যালয়ৰ শ্ৰীশ্ৰীদুৰ্গা পূজা, ৰাধা-কৃষ্ণ আৱাসিক চৌহদত আয়োজন কৰা সাৰ্বজনীন দুৰ্গা পূজা আৰু গকুল নিৱাস হাউছিং সাৰ্বজনীন দুৰ্গা পূজাৰ উপৰিও কেইবাখনো পূজাস্থলীত অংশগ্ৰহণ কৰি মুখ্যমন্ত্ৰী ড৹ হিমন্ত বিশ্ব শৰ্মাই মা দুৰ্গাৰ আশিস গ্ৰহণ কৰে ।
বিসৰ্জনস্থলী পৰিষ্কাৰ কৰাৰ আহ্বান মুখ্যমন্ত্ৰীৰ (ETV Bharat) মুখ্যমন্ত্ৰীৰ আহ্বান
পূজা উপভোগ কৰি মুখ্যমন্ত্রীয়ে সংবাদ মাধ্যমৰ আগত নিজৰ প্ৰতিক্ৰিয়া ব্যক্ত কৰি কয়, "মই অসমবাসী ৰাইজক বিজয়া দশমী আৰু মহাপুৰুষ শ্ৰীমন্ত শংকৰদেৱৰ আবিৰ্ভাৱ উৎসৱৰ বহুত বহুত শুভেচ্ছা জ্ঞাপন কৰিছো । বিগত দিনকেইটাত একেবাৰে মাজনিশালৈ অসমৰ ৰাইজে দুৰ্গা পূজা উৎসৱ পালন কৰিলে । আনহাতে আজিৰে পৰা মহাপুৰুষ শ্ৰীমন্ত শংকৰদেৱৰ আবিৰ্ভাৱ উৎসৱ দুদিনীয়াকৈ পালন কৰা হৈছে । এটা উৎসৱমুখৰ পৰিৱেশ । এটাই মাথো অনুৰোধ যাতে বিজয়া দশমীৰ বিসৰ্জন ভালদৰে হয় । বিসৰ্জনস্থলীসমূহ যাতে বিসৰ্জনৰ পাছত সুন্দৰকৈ চাফ-চিকুণকৈ ৰাখো । আনহাতে আমাৰ যি মিলা-প্ৰীতি সেইটো অক্ষুণ্ণ ৰাখো ।"
উল্লেখ্য যে মুখ্যমন্ত্ৰী ড৹ হিমন্ত বিশ্ব শৰ্মাই ষষ্ঠীৰ পৰা বিগত দিনকেইটাত গুৱাহাটী আৰু ইয়াৰ দাঁতিকাষৰীয়া অঞ্চলৰ উপৰিও কোকৰাঝাৰ, বঙাইগাঁও আৰু চিৰাং জিলাৰ পূজাথলী দৰ্শন কৰিছে ।
লগতে পঢ়ক :আজি কেৱল পূজা, আজি মই 'পলিটিকেল' কথা কোৱা নাই : মুখ্যমন্ত্ৰী
