গোলাঘাট,১৯ জুন: ৰাজ্যৰ প্ৰান্তে প্ৰান্তে অব্যাহত ড্ৰাগছ বিৰোধী অভিযান । তাৰ মাজতে ড্ৰাগছ সৰবৰাহকাৰীৰ ন ন কৌশল । বৰ্তমান গাঁৱে গাঁৱে শিপাইছে ড্ৰাগছ বৰবিহৰ প্ৰচলন । সহজে ধন ঘটাৰ উদ্দেশ্যৰে গাঁৱৰ একাংশ লোক লিপ্ত হৈছে এই বৰবিহৰ প্ৰচলনত । ইয়াৰ মাজতে গোলাঘাট জিলাৰ মেৰাপানী আৰক্ষী থানাৰ অন্তৰ্গত ইছলামপুৰত ৰাইজে খেদি খেদি আটক কৰে ড্ৰাগছ সেৱনকাৰী যুৱকক ।
ইছলামপুৰৰ জাকিৰ আহমেদ নামৰ ড্ৰাগছ ব্যৱসায়ীৰ গৃহৰ পৰা দুটা প্লাষ্টিকৰ টেমাত ড্ৰাগছ সেৱনৰ বাবে নিয়া প্ৰত্যক্ষ কৰি স্থানীয় লোকে ৰামপুৰৰ নুৰউদ্দিন আহমেদৰ পুত্ৰ চৈইব আহমেদ নামৰ যুৱকজনক আটক কৰি উত্তম-মধ্যম শোধোৱাৰ পাচতেই আহমেদৰ ঘৰৰ পৰা হেৰ'ইনসমূহ ক্ৰয় কৰা বুলি স্বীকাৰ কৰে ।
ঘটনা সন্দৰ্ভত মেৰাপানী আৰক্ষী থানাত খবৰ দিয়াত ঘটনাস্থলীত মেৰাপানী আৰক্ষী উপস্থিত হৈ ড্ৰাগছ ব্যৱসায়ী জাকিৰ আহমেদৰ ঘৰত তালাচী চলোৱাত কেইবাটাও হেৰ'ইনসহ টেমা আৰু খালী বাকচ উদ্ধাৰ কৰে । ঘটনাৰ সন্দৰ্ভত আৰক্ষীয়ে ড্ৰাগছ ব্যৱসায়ী জাকিৰৰ লগতে তেওঁৰ পুত্ৰ চাবিৰ, পত্নী তথা বোৱাৰীয়েকক আটক কৰি তদন্ত আৰম্ভ কৰে ।