স্প’ৰ্টছ ডেস্ক, 29 আগষ্ট: ভাৰতৰ ষ্টাইলিছ বেটছমেন বিৰাট কোহলীৰ এটা ভিডিঅ’ ভাইৰেল হৈ পৰিছে সামাজিক মাধ্যমত ৷ য’ত ক্ৰিকেটাৰগৰাকীয়ে সতীৰ্থ তথা দলটোৰ যুৱ অপেনাৰ শুভমন গিলক কঠোৰ সমালোচনা কৰা দেখা গৈছে । ভিডিঅ’টো ভাইৰেল হৈ পৰাৰ পিছতে অনুৰাগীসকলৰ মাজত চলিছে ব্যাপক চৰ্চা ৷
উক্ত ভিডিঅ’টোত কোহলীয়ে শুভমন গিলক কঠোৰ সমালোচনা কৰি নিজকে এগৰাকী আগশাৰীৰ তথা উৎকৃষ্ট ক্ৰিকেটাৰ হিচাপে গণ্য কৰিছে ৷ লগতে শুভমন গিল সেই পৰ্যায়ত উপনীত হ’বলৈ আজিও নোৱাৰিলে বুলি মন্তব্য কৰে ৷ কোহলীৰ এনে আচৰণত অনুৰাগীসকলৰ মাজত সৃষ্টি হৈছে ব্যাপক প্ৰতিক্ৰিয়া ৷
সাম্প্ৰতিক সময়ত দেশৰ অন্যতম প্ৰতিভাশালী বেটছমেন গিলক ভাৰতীয় দলৰ ভৱিষ্যত হিচাপে গণ্য কৰা হৈছে । পঞ্জাৱত জন্মগ্ৰহণ কৰা ক্ৰিকেটাৰজনে যোৱা বছৰ এদিনীয়াত সৰ্বাধিক ৰাণ সংগ্ৰহকাৰীৰ অভিলেখ গঢ়িছিল । এই সময়ছোৱাত গিলে 5 টা শতকৰ সহায়ত 63.36 গড়ে 29 খন মেচত সংগ্ৰহ কৰিছিল 1,584 ৰাণ ।
তেনে এক প্ৰদৰ্শনৰ পিছতো কোহলীৰ মন্তব্যই স্বাভাৱিকতে বিৰূপ প্ৰতিক্ৰিয়াৰ সৃষ্টি কৰিছে গিলৰ অনুৰাগীৰ লগতে ক্ৰিকেটপ্ৰেমীসকলৰ মাজতো ৷ অৱশ্যে এই চৰ্চা অব্যাহত থকাৰ মাজতে এই ভিডিঅ’ ভুৱা বুলি পোহৰলৈ আহে ৷
কোহলীৰ ডিপফেক ভিডিঅ' ভাইৰেল
সামাজিক মাধ্যমত প্ৰকাশ পোৱা ভিডিঅ’টোত কোহলীয়ে কয় যে, গিলে তেওঁক দিয়া প্ৰতিশ্ৰুতি অনুসৰি ধাৰাবাহিকভাৱে উন্নত প্ৰদৰ্শন কৰা নাই । 35 বছৰীয়া যুৱ ক্ৰিকেটাৰগৰাকীয়ে এইটোও দাবী কৰা ভিডিঅ’টোত দেখা গৈছে যে, কোনেও তেওঁৰ উত্তৰাধিকাৰী হোৱাৰ বাবে যোগ্য নহয় ৷ লগতে তেওঁ অকলেহে ভৱিষ্যত প্ৰজন্মৰ বাবে ক্ৰিকেটৰ ক্ষেত্ৰত এক মানদণ্ড স্থাপন কৰিছে বুলিও দাবী কৰে ৷
"যেতিয়া আমি অষ্ট্ৰেলিয়াৰ পৰা উভতি আহিছিলো, মই অনুভৱ কৰিছিলো যে সৰ্বোচ্চ পৰ্যায়ত সফল হ’বলৈ কি লাগে । মই গিলক ওচৰৰ পৰা চাই আছোঁ । তেওঁ প্ৰতিভাশালী ইয়াত কোনো সন্দেহ নাই । কিন্তু বিশ্বাস দেখুওৱা আৰু কিংবদন্তি হোৱাৰ মাজত এটা ডাঙৰ পাৰ্থক্য আছে । গিলৰ কৌশল দৃঢ় কিন্তু নিজকে আগুৱাই নিদিব" বুলি কোহলীয়ে ডিপফেক ভিডিঅ’টোত সদৰী কৰিছে ৷
গিল পৰৱৰ্তী কোহলী হোৱাটো কঠিন
"সকলোৱে পৰৱৰ্তী বিৰাট কোহলীৰ বিষয়ে কয় ৷ কিন্তু মই স্পষ্ট কৰি দিওঁ, মাত্ৰ এজনে বিৰাট কোহলী আছে । মই আটাইতকৈ কঠিন বলাৰৰ সন্মুখীন হৈছো, আটাইতকৈ কঠিন পৰিস্থিতিত প্ৰদৰ্শন কৰিছো আৰু এক দশকৰো অধিক সময় ধৰি একেৰাহে এই কাম কৰি আহিছো । গিলৰ কেৱল কেইটামান ভাল ইনিংছে সেয়া সলনি কৰিব নোৱাৰে । যদি মই ভুল সিদ্ধান্ত লওঁ, মই বাহিৰত বহি গোটেই দিনটো হাততালি দিওঁ ৷ ভাৰতীয় ক্ৰিকেটত ঈশ্বৰ(শচীন তেণ্ডুলকাৰ) প্ৰথম আৰু তাৰপিছত মই । এইটোৱেই মানদণ্ড । গিলে সেই স্তৰত উপনীত হোৱাৰ আগতে বহুদূৰ যাব লাগিব" বুলি ভুৱা ভিডিঅ’টোত উল্লেখ কৰা হৈছে ৷
অনুৰাগীসকলে কৈছিল – এ আই বিপদজনক
অনুৰাগীসকলে এই পোষ্টটোত তীব্ৰ প্ৰতিক্ৰিয়া প্ৰকাশ কৰিছে । একাংশই কৈছিল যে, ভিডিঅ’টো সম্পাদনা কৰা হৈছে । এই ক্লিপটোৰ প্ৰতি প্ৰতিক্ৰিয়া ব্যক্ত কৰি এগৰাকী সামাজিক মাধ্যম ব্যৱহাৰকাৰীয়ে কয়, "মই আধা টোপনিত থাকিলেও ভালদৰে জানো যে বিৰাটে এনেদৰে কথা নকয় ৷ এয়া তেওঁৰ কণ্ঠস্বৰো নহয়" ৷
আন এজনে কৈছিল যে পোষ্টটো "এ আই ৰ দ্বাৰা তৈয়াৰী" আছিল । একে ধৰণৰ কথা উল্লেখ কৰি আন এজনে লিখিছিল, "এক মুহূৰ্তৰ বাবে, মই ভাবিছিলো যে এইটো সঁচা । এ আই নিশ্চিতভাৱে বিপদজনক" ৷
লগত পঢ়ক:আই চি চি ৰ অধ্যক্ষ জয় শ্বাহৰ দৰমহা কিমান ? জানিলে আচৰিত হৈ পৰিব আপুনি - ICC CHAIRMAN JAY SHAH SALARY
