স্পৰ্টছ ডেস্ক, ১ আগষ্ট :ভাৰতৰ ক্ৰীড়াপ্ৰেমীৰ বাবে আন এক হতাশাজনক খবৰ । কিয়নো ভাৰতৰ বাবে পদকৰ অন্যতম দাবীদাৰ সাতৱিকসাইৰাজ ৰেঙ্কিৰেড্ডী আৰু চিৰাগ চেট্টীৰ পেৰিছ অলিম্পিক অভিযান সমাপ্ত হ'ল । বৃহস্পতিবাৰে খেলা বেডমিণ্টন পুৰুষৰ ডাবলছৰ কোৱাৰ্টাৰ ফাইনেল খেলখনত ভাৰতৰ তাৰকা শ্বাটলাৰ যুটিটোৱে মালয়েছিয়াৰ যুটিৰ বিৰুদ্ধে পৰাজয়ৰ সন্মুখীন হয় । মালয়েছিয়াৰ আৰোন চিয়া আৰু সোহ ৱুই য়িৰ যুটিয়ে ভাৰতীয় যুটিটোক ২১-১৩, ১৪-২১, ২১-১৬ ত পৰাস্ত কৰে । এই জয়ৰ দ্বাৰা মালয়েছিয়াৰ যুটিটোৱে ছেমি ফাইনেলত প্ৰৱেশ কৰে ।
আক্ৰমণাত্মক আৰম্ভণি সাতৱিক-চিৰাগৰ
ভাৰতীয় যুটিটোৱে খেলখনত এক সুন্দৰ আৰম্ভণি লাভ কৰিছিল আৰু প্ৰথম শৃংখলাৰ আৰম্ভণিতে মালয়েছিয়াৰ যুটিৰ সন্মুখত প্ৰত্যাহ্বান হিচাপে থিয় দিছিল । মালয়েছিয়াৰ যুটিটোৱেও কঠোৰ পৰিশ্ৰম কৰিবলগীয়া হৈছিল আৰু প্ৰথমখন খেলত সাতৱিক-চিৰাগে ১১-১০ পইণ্টৰ সৈতে মধ্য বিৰতিলৈকে সামান্য ব্যৱধানত আগবাঢ়ি আছিল । অৱশ্যে বিৰতিৰ পিচত ভাৰতে সুন্দৰ প্ৰদৰ্শন কৰিছিল আৰু বিপক্ষক বিশেষ সুযোগ দিয়া নাছিল । যাৰ বাবে প্ৰথম খন খেলত ২১-১৩ পইণ্টত জয়ী হয় ।
দ্বিতীয়খন খেলত মালয়েছিয়া উভতি আহে
প্ৰথম খেলত সহজে জয়ী হ'লেও পিচত ভাৰতীয় যুটিটোৱে দ্বিতীয় খন খেলত কঠিন পৰিশ্ৰম কৰিবলগীয়া হয় । টকিঅ' ২০২০ৰ ব্ৰঞ্জ পদক বিজয়ী মালয়েছিয়াৰ চিয়া-সোহ যুটিয়ে দ্বিতীয় খেলত এক লক্ষণীয় প্ৰত্যাৱৰ্তন কৰে আৰু মালয়েছিয়াৰ যুটিটোৱে প্ৰথমবাৰৰ বাবে ৫-৪ ত আগবাঢ়ি যায় । এই খেলখনত মালয়েছিয়াৰ যুটিটোৱে কোনো ভুল কৰা নাছিল আৰু আক্ৰমণাত্মক দৃষ্টিভংগী লৈছিল । লগতে ভাৰতীয় যুটিটোক ২১-১৪ ত পৰাস্ত কৰিছিল ।
তীব্ৰ প্ৰত্যাহ্বানপূৰ্ণ খেল
তৃতীয় খেলখনত ভাৰত আৰু মালয়েছিয়াৰ মাজত তীব্ৰ যুঁজ হোৱা দেখা যায় । ভাৰতীয় যুটিটোৱে ৫-২ত পিছ পৰি আছিল যদিও পিচত আকৰ্ষণীয় প্ৰদৰ্শনৰ জৰিয়তে ৫-৫ পইণ্ট সংগ্ৰহ কৰিছিল । দুয়োটা যুটিয়েই পৰাজয় স্বীকাৰ কৰিবলৈ প্ৰস্তুত নাছিল । যাৰ বাবে তৃতীয় খন খেল যথেষ্ট ৰোমাঞ্চকৰ আছিল । সাতৱিক-চিৰাগে আক্ৰমণ অব্যাহত ৰাখিছিল আৰু বিৰতিৰ মাজভাগত ১১-৯ ত আগবাঢ়ি গৈছিল ।
কিন্তু পৰৱৰ্তী পৰ্যায়ত মালয়েছিয়াৰ যুটিটোৱে বহুতো উৎকৃষ্ট শ্বটৰ নিদৰ্শন দেখুৱাইছিল । এটা সময়ত স্ক'ৰ ১৪-১৪ত আছিল । কিন্তু বিৰতিৰ পিচত ভাৰতীয় যুটিটোৱে নিয়ন্ত্ৰণ হেৰুৱায় আৰু জয়ী হ'ব পৰা পইণ্ট অৰ্জন কৰিবলৈ সক্ষম হয় । অৱশেষত ভাৰতীয় যুটিটোৱে ২১-১৬ত পৰাজয়ৰ সন্মুখীন হ'ব লগা হয় ।
