স্পৰ্টছ ডেস্ক, ৯ আগষ্ট :পেৰিছ অলিম্পিক ২০২৪ত পুৰুষৰ জেভলিন থ্ৰ' ইভেণ্টৰ ফাইনেল বৃহস্পতিবাৰে অনুষ্ঠিত হৈছিল । ভাৰতে আশা কৰিছিল যে গ'ল্ডেন বয় নীৰজ চোপ্ৰাই একেৰাহে দ্বিতীয়বাৰৰ বাবে স্বৰ্ণ পদক লাভ কৰিব । কিন্তু নীৰজ চোপ্ৰা ৰূপৰ পদকতে সন্তুষ্ট থাকিবলগীয়া হয় ।
আনহাতে পাকিস্তানৰ আৰ্শাদ নাদিমে অলিম্পিকৰ অভিলেখ ভংগ কৰে আৰু ৯২.৯৭ মিটাৰ থ্ৰ'ৰে সোণৰ পদক লাভ কৰে । ৰূপৰ পদকতে সন্তুষ্ট থকা স্বত্বেও ২৬ বছৰীয়া ভাৰতীয় খেলুৱৈ নীৰজ চোপ্ৰাই দেশক গৌৰৱান্বিত কৰিবলৈ সক্ষম হয় ।
ট্ৰেক এণ্ড ফিল্ডত ২ টা পদক জয়ী প্ৰথম ভাৰতীয়
ভাৰতৰ তাৰকা জেভলিন থ্ৰ'ৱাৰ নীৰজ চোপ্ৰাই সোণৰ পৰা বঞ্চিত হোৱা স্বত্বেও এক বৃহৎ অভিলেখ গঢ়িবলৈ সক্ষম হয় । নীৰজে তেওঁৰ ৮৯.৪৫ মিটাৰ ছিজনৰ সৰ্বশ্ৰেষ্ঠ থ্ৰ'ৰ জৰিয়তে ৰূপৰ পদক লাভ কৰে আৰু একেৰাহে অলিম্পিকত দ্বিতীয়টো পদক জয় কৰা প্ৰথম ভাৰতীয় ট্ৰেক এণ্ড ফিল্ড খেলুৱৈ হিচাপে পৰিগণিত হয় । নীৰজে টকিঅ' অলিম্পিকত সোণৰ পদক লাভ কৰিছিল আৰু এতিয়া পেৰিছত ৰূপৰ পদক লাভ কৰিছে ।
অলিম্পিকত একেৰাহে ব্যক্তিগত পদক জয়ী তৃতীয় ভাৰতীয়
পেৰিছ অলিম্পিকত ৰূপৰ পদক জয় কৰাৰ লগে লগে নীৰজ চোপ্ৰা একেৰাহে ২ টা অলিম্পিকত (২০২১, ২০২৪) ব্যক্তিগত ক্ৰীড়াত পদক অৰ্জন কৰা তৃতীয় ভাৰতীয় হৈ পৰিছে । নীৰজৰ পূৰ্বে তাৰকা মল্লযুঁজাৰু সুশীল কুমাৰ (২০০৮ আৰু ২০১২) আৰু তাৰকা বেডমিণ্টন খেলুৱৈ পি ভি সিন্ধুয়ে (২০১৬ আৰু ২০২১) এই কৃতিত্ব অৰ্জন কৰিছে ।
১ টাতকৈ অধিক ব্যক্তিগত অলিম্পিক পদক জয়ী পঞ্চম ভাৰতীয়