স্প’ৰ্টছ ডেস্ক, 18 জুলাই: ভাৰতৰ উইকেটকীপাৰ বেটছমেন ঈশান কিষাণৰ আজি ওপজা দিন ৷ সেই উপলক্ষে খেলুৱৈগৰাকী উপস্থিত হয় শিৰদীস্থিত সাই বাবা মন্দিৰত ৷ ভাৰত আৰু শ্ৰীলংকাৰ মাজত অনুষ্ঠিত হ’বলগীয়া শৃংখলাৰ বাবে এতিয়াও বাছনি কৰা হোৱা নাই দল ৷ দীৰ্ঘসময়ৰ বাবে দলৰ পৰা আঁতৰি থকা খেলুৱৈগৰাকীয়ে আধ্যাত্মিকভাৱে জন্মদিনটো পালন কৰি ভাৰত-শ্ৰীলংকাৰ শৃংখলাটোত নিজৰ নাম অন্তৰ্ভুক্তিৰ আশা কৰে ৷
ঈশানে সাই বাবাৰ আশীৰ্বাদ ল'বলৈ শিৰদীত উপস্থিত হোৱা ফটো ইতিমধ্যে সামাজিক মাধ্যমৰ জৰিয়তে শ্বেয়াৰ কৰিছে ৷ ভাৰতীয় ক্ৰিকেটৰ আটাইতকৈ প্ৰতিশ্ৰুতিসম্পন্ন যুৱ প্ৰতিভাসকলৰ মাজৰে এজন ঈশান কিষাণে চলিত বছৰত কঠিন সময় পাৰ কৰি আহিছে ৷ ভাৰতীয় ক্ৰিকেট নিয়ন্ত্ৰণ ব'ৰ্ডে(বি চি চি আই) বাওহতীয়া বেটছমেন গৰাকীৰ নাম মূল একাদশৰ পৰা কৰ্তন কৰিছিল ৷
খেলুৱৈগৰাকীৰ ইনষ্টাগ্ৰাম হেণ্ডেলত আপলোড কৰা এটা পোষ্টত ঈশানক আশীৰ্বাদ বিচাৰি নমস্কাৰ ভংগীত থকা দেখা যায় ৷ এদিনীয়া মেচত দ্ৰুততম দ্বি-শতক অৰ্জন কৰাৰ ক্ষেত্ৰত অভিলেখ গঢ়া বাওঁহতীয়া বেটছমেনগৰাকীক 2023-24 বৰ্ষত তিনিওটা ফৰ্মেটত দক্ষিণ আফ্ৰিকা ভ্ৰমণৰ বাবে নিৰ্বাচিত কৰা হৈছিল ।