স্পৰ্টছ ডেস্ক, ২৯ জানুৱাৰী : ভাৰত আৰু ইংলেণ্ডৰ মাজত চলিত টেষ্ট শৃংখলাৰ হায়দৰাবাদৰ ৰাজীৱ গান্ধী আন্তঃৰাষ্ট্ৰীয় ষ্টেডিয়ামত অনুষ্ঠিত প্ৰথমখন টেষ্টত দেওবাৰে ইংলেণ্ডে ভাৰতক ২৮ ৰাণত পৰাস্ত কৰে । ভাৰতে জয়ৰ দুৱাৰদলিত থকা মেচ খন অন্তিম ডেৰ দিনত তেওঁলোকৰ হাতৰ পৰা ওলাই যায় আৰু মেচখনত অপ্ৰত্যাশিতভাৱে টীম ইণ্ডিয়া পৰাস্ত হয় । এই শোচনীয় পৰাজয়ৰ পিছত দ্বিতীয় টেষ্টৰ পূৰ্বে ভাৰতীয় অনুৰাগীসকলৰ বাবে আন এক বেয়া খবৰ আহিছে । ২ ফেব্ৰুৱাৰীৰ পৰা বিশাখাপট্টনমত আৰম্ভ হ'বলগা দ্বিতীয় টেষ্টৰ পৰা তাৰকা অলৰাউণ্ডাৰ ৰবীন্দ্ৰ জাদেজা বাহিৰ হ'ব পাৰে ।
ক্ৰিকবাজৰ এক প্ৰতিবেদন অনুসৰি, হায়দৰাবাদ টেষ্টৰ চতুৰ্থদিনা ৰবীন্দ্ৰ জাদেজাই হেমষ্ট্ৰিঙৰ আঘাতত ভোগে । যাৰ বাবে তেওঁৰ দ্বিতীয় টেষ্ট অনিশ্চিত হৈ পৰিছে । উল্লেখ্য যে দেওবাৰে বেন ষ্টোকছৰ দ্বাৰা ৰাণ আউট হোৱাৰ সময়ত জাদেজাক অস্বস্তিকৰ অৱস্থাত আৰু বিষ অনুভৱ কৰা যেন দেখা গৈছিল । ইতিমধ্যে তেওঁৰ স্কেনৰ প্ৰতিবেদন মুম্বাইলৈ প্ৰেৰণ কৰা হৈছে । হেমষ্ট্ৰিঙৰ আঘাতৰ তীব্ৰতা সোমবাৰে মূল্যাঙ্কন কৰা হ'ব বুলি আশা কৰা হৈছে । এই ক্ষেত্ৰত সংশ্লিষ্ট সূত্ৰই তেওঁ 2 ফেব্ৰুৱাৰীৰ পৰা আৰম্ভ হ'বলগীয়া দ্বিতীয় টেষ্টত দলৰ পৰা বাদ পৰিব পাৰে বুলি সম্ভাৱনা ব্যক্ত কৰিছে ।
অৱশ্যে এক জ্ঞাত সূত্ৰই এইটোও কৈছে যে এইটো হেমষ্ট্ৰিঙৰ আঘাত নহয়, এক টানহে অনুভৱ কৰিছে । সেয়েহে যদি তেওঁ বিশাখাপট্টনমত খেলিবলগীয়া দ্বিতীয় টেষ্টত খেলিব নোৱাৰে, তেন্তে তেওঁ নিশ্চিতভাৱে তৃতীয় টেষ্টৰ বাবে ফিট হ'ব । এনে পৰিস্থিতিত এতিয়া জাদেজাৰ স্কেন প্ৰতিবেদনৰ ওপৰত সকলোৰে দৃষ্টি নিবদ্ধ হৈ আছে । কিন্তু যদি জাদেজা দ্বিতীয় টেষ্টৰ পৰা বাহিৰ হ'বলগা হয়, তেন্তে এইটো টীম ইণ্ডিয়াৰ বাবে এক মোক্ষম আঘাত হ'ব । কিয়নো ঘৰুৱা মেচত তেওঁৰ অভিলেখ অতি চমৎকাৰ ।