স্পৰ্টছ ডেস্ক, ১৮ মাৰ্চ : দ্বিতীয় ডব্লিউপিএলৰ খিতাপ জয় কৰে আৰচিবিয়ে । দেওবাৰে দিল্লীৰ অৰুণ জেটলি ষ্টেডিয়ামত অনুষ্ঠিত ফাইনেলত আৰচিবিয়ে দিল্লী কেপিটেলছক পৰাস্ত কৰি প্ৰথমবাৰৰ বাবে বিজয়ী ট্ৰফীত স্পৰ্শ কৰে । আনহাতে, ৰয়েল চেলেঞ্জাৰ্ছ বাংগালোৰৰ (আৰচিবি) অধিনায়ক স্মৃতি মান্ধানাই কয় যে বিগত বছৰ মহিলা প্ৰিমিয়াৰ লীগৰ (ডব্লিউপিএল) উদ্বোধনী ছিজনত দলটোৰ হতাশাজনক প্ৰদৰ্শন সত্ত্বেও তেওঁ মেনেজমেণ্টৰ পৰা দৃঢ় সমৰ্থন লাভ কৰিছিল । যাৰ ফলত তেওঁৰ আত্মবিশ্বাস বৃদ্ধি পায়, যিয়ে তেওঁলোকক বহু দূৰ লৈ গৈছে । দেওবাৰে খিতাপ অৰ্জনৰ পিচত স্মৃতিয়ে কয় ।
মান্ধানাই লগতে উল্লেখ কৰে যে বিগত ছিজনটোৱে তেওঁলোকক বহু কথা শিকাইছিল । যিহেতু বিভিন্ন খেলুৱৈয়ে সমগ্ৰ প্ৰতিযোগিতাখনত বিভিন্ন বৰঙণি আগবঢ়াইছিল, তাৰ বাবেই তেওঁলোক আগবাঢ়ি গৈছিল আৰু ডব্লিউপিএল ফাইনেলত দিল্লী কেপিটেলছক আঠ উইকেটত পৰাস্ত কৰিবলৈ সক্ষম হৈছিল ।
এই বিজয়ৰ সৈতে বাংগালোৰৰ দলটোৱে একেটা ফ্ৰেন্সাইজীৰ পুৰুষ দলটোৱে 16 বছৰে যি সপোন পূৰণ কৰিব পৰা নাই, সেয়া কৰিবলৈ সক্ষম হৈছে । লগতে মান্ধানাই সদায় দলটোক সমৰ্থন কৰাৰ বাবে তেওঁলোকৰ অনুৰাগীসকলক ধন্যবাদ জনায় ।
খেলৰ অন্তত বঁটা বিতৰণী অনুষ্ঠানত ভাষণ দি মান্ধানাই কয়, "যোৱা বছৰটোৱে আমাক এগৰাকী খেলুৱৈ হিচাপে, অধিনায়ক হিচাপে আৰু এটা দল হিচাপে বহুতো কথা শিকাইছিল । মেনেজমেণ্টে যিদৰে ছিজনটোৰ পিছত পৰ্যালোচনাৰ সময়ত মোক সমৰ্থন কৰিছিল, তেওঁলোকে আমাক বহুত দিছে আৰু তাৰ বাবে তেওঁলোকক ধন্যবাদ ।"