স্পৰ্টছ ডেস্ক, ১৭ ফেব্ৰুৱাৰী :ভাৰত-ইংলেণ্ডৰ মাজৰ তৃতীয় টেষ্টৰ তৃতীয়দিনা ভাৰতীয় শিবিৰত মোক্ষম আঘাত । অফ স্পিনাৰ আৰ অশ্বিনে পাৰিবাৰিক চিকিৎসাজনিত জৰুৰীকালীন অৱস্থাৰ বাবে তাৎক্ষণিকভাৱে ৰাজকোট টেষ্ট দলৰ পৰা নিজৰ নাম প্ৰত্যাহাৰ কৰিছে । বিচিচিআয়ে সংবাদ মাধ্যমলৈ দিয়া এক বিবৃতিত প্ৰকাশ কৰিছে যে বিচিচিআয়ে চেম্পিয়ন ক্ৰিকেটাৰগৰাকী আৰু তেওঁৰ পৰিয়াললৈ আন্তৰিক সমৰ্থন আগবঢ়াইছে । খেলুৱৈ আৰু তেওঁলোকৰ প্ৰিয়জনৰ স্বাস্থ্য আৰু কল্যাণ অতি গুৰুত্বপূৰ্ণ । বোৰ্ডে লগতে অশ্বিন আৰু তেওঁৰ পৰিয়ালৰ গোপনীয়তাক সন্মান জনাবলৈও অনুৰোধ জনায় । লগতে কয় যে তেওঁলোকে বৰ্তমান এক প্ৰত্যাহ্বানপূৰ্ণ সময়ৰ মাজেৰে গতি কৰি আছে ।
"বোৰ্ড আৰু দলে অশ্বিনক সকলো প্ৰয়োজনীয় সমৰ্থন আগবঢ়োৱাটো অব্যাহত ৰাখিব । আমি প্ৰয়োজন অনুসৰি সহায়ৰ বাবে অশ্বিনৰ সৈতে যোগাযোগৰ সকলো মাধ্যম মুকলি ৰাখিম । টীম ইণ্ডিয়াই অনুৰাগী আৰু সংবাদ মাধ্যমক এই সংবেদনশীল সময়ছোৱাত অশ্বিনৰ গোপনীয়তাক সন্মান কৰিবলৈ অনুৰোধ জনাইছে ।" বিবৃতিটোত কোৱা হৈছে ।