ৰাজ্যৰ গৃহ বিভাগ বিফল হৈছে : গৌৰৱ গগৈ

চামগুৰিৰ হিংসাত্মক ঘটনাৰ আঁৰত আছে কোন ? মুখ্য়মন্ত্ৰীয়ে কিয় এই ঘটনা প্ৰতিৰোধৰ বাবে চেষ্টা কৰা নাই ? প্ৰশ্ন কৰিলে গৌৰৱ গগৈয়ে ।

বিশ্বনাথ : অহা ১৩ নৱেম্বৰত ৰাজ্যত অনুষ্ঠিত হ'ব উপ-নিৰ্বাচন । এই উপ-নিৰ্বাচনক লৈ ৰাজ্যত সৃষ্টি হৈছে উত্তাল পৰিস্থিতিৰ । ৰাজ্যৰ অন্যতম বিধানসভা সমষ্টি চামগুৰিত দেখা গৈছে নিৰ্বাচনকেন্দ্ৰিক হিংসাত্মক ঘটনা । ৰাজ্যৰ আন চাৰিটা সমষ্টিৰ তুলনাত চামগুৰি সমষ্টিটোত বিজেপি আৰু কংগ্ৰেছৰ কৰ্মীসকলৰ মাজত দৈনিক বৃদ্ধি পাইছে ভয়ংকৰ মাৰপিটৰ ঘটনা ।

ইয়াৰ মাজতেই দেওবাৰে বিহালীত প্ৰতিক্ৰিয়া প্ৰকাশ কৰে সাংসদ গৌৰৱ গগৈয়ে । যোৰহাটৰ সাংসদ গৌৰৱ গগৈয়ে এই সন্দৰ্ভত কয়, "অসমত নোহোৱা নোপজা ঘটনা সংঘটিত হ'বলৈ ধৰিছে । কাৰণ অসমত পূৰ্বে অনুষ্ঠিত হোৱা নিৰ্বাচনত কোনো হিংসাত্মক ঘটনা সংঘটিত হোৱা নাছিল ।"

চামগুৰি সমষ্টিত সংঘটিত হিংসাত্মক ঘটনাত অসম চৰকাৰৰ গৃহ বিভাগক জগৰীয়া কৰিছে সাংসদ গৌৰৱ গগৈয়ে । তেওঁ গৃহ বিভাগৰ দায়িত্বত থকা মুখ্যমন্ত্ৰী ড৹ হিমন্ত বিশ্ব শৰ্মাকো দোষাৰোপ কৰে । স্থানীয় জিলাৰ আৰক্ষী অধীক্ষক ওপৰত ব্যৱস্থা ল'বলৈ দাবী জনায় সাংসদ গৌৰৱ গগৈয়ে ।

সাংসদগৰাকীয়ে কয়, "বৰ্তমান চৰকাৰৰ গৃহ বিভাগৰ দায়িত্ব মুখ্যমন্ত্ৰী হিমন্ত বিশ্ব শৰ্মা । আৰক্ষী তেওঁলোকৰ, প্ৰশাসনো তেওঁলোকৰ, তেন্তে কেনেকৈ এইদৰে হিংসাত্মক ঘটনা, গুলীচালানাৰ ঘটনা সংঘটিত হ'বলৈ পাৰিছে । প্ৰথমে যদি এই ঘটনাৰ বিৰুদ্ধে আৰক্ষী প্ৰশাসন কঠোৰ হ'লহেতেন তেতিয়া ইমান উত্তপ্ত নহ'লহেঁতেন । সমষ্টিটোত সাধাৰণ জনতা ওলাব পৰা নাই, সাংবাদিক ওলাব পৰা নাই, সাংবাদিকৰ ওপৰত আক্ৰমণ, সাধাৰণ ভোটাৰৰ ওপৰত আক্ৰমণ, এয়া বিজেপি চৰকাৰৰ কাম ।"

তেওঁ পুনৰ কয়, "গৃহ বিভাগক বিফল হৈছে । গৃহ বিভাগৰ দায়িত্ব কোন আছে ? মুখ্যমন্ত্ৰী আছে যদিও আজি মুখ্যমন্ত্ৰী বিফল । অসম আৰক্ষী বিফল,নাগৰিকৰ ওপৰত আক্ৰমণ হৈছে,সাংবাদিকৰ ওপৰত আক্ৰমণ । নাগৰিকৰ দোকান-বজাৰ নষ্ট হৈছে । এক হুলস্থূলীয়া পৰিৱেশত আমাৰ মানুহবোৰ ভয় খাইছে, ভয়মুক্ত নিৰ্বাচন হ'ব লাগে । "

লগতে পঢ়ক:ঠিকাদাৰক সন্তুষ্ট কৰিবলৈকে দীঘলীপুখুৰী পাৰৰ ২০০ বছৰীয়া গছ কাটিব বিচাৰিছে চৰকাৰে: গৌৰৱ গগৈ