নগাঁও, ২৩ আগষ্ট : নগাঁৱৰ ধিঙৰ কিশোৰী ধৰ্ষণকাণ্ডই জোকাৰিছে সমগ্ৰ ৰাজ্য ৷ এগৰাকী দশম শ্ৰেণীৰ ছাত্ৰীক দলবদ্ধ ধৰ্ষণৰ ঘটনাক লৈ সমগ্ৰ ধিং অঞ্চলত প্ৰতিবাদ অব্যাহত থকাৰ সময়ত শুকুৰবাৰে ধিঙত উপস্থিত হয় অসম জাতীয় পৰিষদৰ সভাপতি লুৰীণজ্যোতি গগৈ ৷
ধিঙত অজাপৰ সভাপতি লুৰীণজ্যোতি গগৈ (ETV Bharat Assam) শুকুৰবাৰে বিয়লি ধিঙত উপস্থিত হৈ কিশোৰী ধৰ্ষণৰ ঘটনাক তীব্ৰ ভাষাৰে গৰিহণা দিয়াৰ লগতে শাসকীয় বিজেপি চৰকাৰৰ দিনতেই ৰাজ্যত নাৰী নিৰ্যাতৰ দৰে ঘটনা বৃদ্ধি পোৱা বুলি মন্তব্য কৰে লুৰীণজ্যোতি গগৈয়ে ৷ ধিঙত সংঘটিত কিশোৰী ধৰ্ষণৰ ঘটনাত জড়িত দোষীক মৃত্যুদণ্ডৰ দৰে শাস্তি প্ৰদানৰ দাবী উত্থাপন কৰে অজাপৰ সভাপতিগৰাকীয়ে ৷
অপৰাধীৰ কোনো জাতি অথবা ধৰ্ম নাই বুলি মন্তব্য কৰে লুৰীণজ্যোতি গগৈয়ে ৷ তেওঁ কয়, ‘‘ চৰকাৰৰ পক্ষপাতমূলক আচৰণৰ কাৰণে বহু অপৰাধী আঁতৰি যাবলগীয়া হয় ৷ অপৰাধীজন চৰকাৰী পক্ষত আছেনে নাই, বিজেপিৰ হয়নে নহয়, অথবা ধৰ্ম চাই তেওঁলোকে সিদ্ধান্ত লয় বাবেই কেতিয়াবা শাস্তিৰ সন্মুখীন নহয় ৷’’
বৰ্তমানৰ বিজেপি চৰকাৰে অপৰাধীক পক্ষপাতমূলক দৃষ্টিৰে চোৱাৰ বাবেই অসমত ধৰ্ষণ, হত্যাৰ দৰে অপৰাধ বৃদ্ধি পোৱা বুলিও মন্তব্য কৰে জাতীয় পৰিষদৰ সভাপতি লুৰীণজ্যোতি গগৈয়ে । এনে অপৰাধ নিৰ্মূলৰ বাবে চৰকাৰে অপৰাধীৰ দৃষ্টিভংগীৰে চাই কঠোৰতকৈ কঠোৰ ব্যৱস্থা গ্ৰহণ কৰিব লাগিব বুলিও মন্তব্য কৰে অজাপৰ সভাপতিগৰাকীয়ে ৷ তদুপৰি শাসকীয় বিজেপি চৰকাৰে নাৰীক সুৰক্ষা প্ৰদান নকৰাৰ ফলতেই নাৰী নিৰ্যাতনৰ দৰে ঘটনা বৃদ্ধি পোৱা বুলিও মন্তব্য কৰে তেওঁ ৷
হত্যা-ধৰ্ষণৰ দৰে অপৰাধৰ বিৰুদ্ধে চৰকাৰে যিদৰে ক্ষীপ্ৰতাৰে ব্যৱস্থা গ্ৰহণ কৰিব লাগে, তেনে ব্যৱস্থা গ্ৰহণ নকৰাৰ বাবেই এনে অপৰাধ বৃদ্ধি পোৱা বুলিও মন্তব্য কৰে লুৰীণজ্যোতি গগৈয়ে । উল্লেখযোগ্য যে, ধিঙৰ কিশোৰী ধৰ্ষণৰ ঘটনাত জড়িত তফাজ্জুল ইছলাম নামৰ এজন অভিযুক্তক আটক কৰি আৰক্ষীয়ে মাৰাথান জেৰা অব্যাহত ৰখা বুলি জানিব পৰা গৈছে ৷ ধৃত অভিযুক্ত অপৰাধীৰ বিৰুদ্ধে আৰক্ষীয়ে কিছু তথ্য লাভ কৰা বুলিও শুকুৰবাৰে উল্লেখ কৰিছিল অসম আৰক্ষীৰ সঞ্চালক প্ৰধান জি পি সিঙে ৷
লগতে পঢ়ক :ধিংকাণ্ড : দোষীক ফাঁচীৰ দাবী আলফা স্বাধীনৰ
ধিংকাণ্ড : লোকসভা নিৰ্বাচনৰ পিছত কিছু লোকৰ মনোবল বৃদ্ধি পোৱা বুলি মন্তব্য মুখ্যমন্ত্ৰীৰ
