ডিব্ৰুগড়, 11 এপ্ৰিল : ডিব্ৰুগড় লোকসভা সমষ্টিত আকৰ্ষণীয় হৈ উঠিছে নিৰ্বাচনী প্ৰচাৰ ৷ ইফালে মুখ্যমন্ত্ৰী হিমন্ত বিশ্ব শৰ্মাই উজনিত অব্যাহত ৰাখিছে মাৰাথন প্ৰচাৰ ৷ বৃহস্পতিবাৰে খোৱাং সমষ্টিৰ অন্তৰ্গত কোটোহাত ডিব্ৰুগড় লোকসভা সমষ্টিৰ বিজেপি প্ৰাৰ্থী সৰ্বানন্দ সোণোৱালৰ হৈ নিৰ্বাচনী প্ৰচাৰ চলালে মুখ্যমন্ত্ৰীয়ে ৷
কোটোহা হাইস্কুল খেলপথাৰত বিশাল নিৰ্বাচনী প্ৰচাৰ সভাত অংশগ্ৰহণ কৰি কংগ্ৰেছক তীব্ৰ কটাক্ষ মুখ্যমন্ত্ৰী হিমন্ত বিশ্ব শৰ্মাৰ ৷ কংগ্ৰেছৰ ৰকিবুল হুছেইন থকাৰ সময়ত খৰ্গ নথকা গঁড় চাবলৈ পৰ্যটক আহিব লগা হৈছিল বুলি মন্তব্য কৰে মুখ্যমন্ত্ৰীজনে ৷ লগতে মুখ্যমন্ত্ৰী ড৹ হিমন্ত বিশ্ব শৰ্মাই সভাত ৰাইজক উদ্দেশ্যি কয় যে এতিয়া এখন নতুন অসম গঢ়িবলৈ লোৱা হৈছে ৷ য'ত কোনো প্ৰতিবাদ নাথাকে, থাকিব কেৱল পঢ়া-শুনা আৰু সকলোৱে যাতে ডাক্তৰ-ইঞ্জিনিয়াৰ হ'ব পাৰে ৷
লগতে তেওঁ কয় যে, কেৱল ৰাজপথত জয় আই অসম বুলি চিঞৰি থাকিলেই ন'হব ৷ দুখীয়াৰ মুখত স্বতঃস্ফূৰ্তভাৱে জয় আই অসম নোলায় ৷ ঘৰ-মাটি-ভেটি নথকা লোকে জয় আই অসম নকয় ৷ যেতিয়া সংস্থাপন হ'ব, যেতিয়া ঘৰ-মাটি ভেটি হ'ব তেতিয়া স্বতঃস্ফূৰ্তভাৱে সকলোৰে মুখত জয় আই অসম ধ্বনি ওলাব আৰু সেই পদক্ষেপ বিজপি দলে কৰিছে ৷ পদুম ফুলত ভোট দিলে উন্নয়নৰ নতুন ধাৰা আৰম্ভ হ'ব বুলি কয় তেওঁ ৷