উপ-নিৰ্বাচনত বিপিএফ কিয় পৰাজিত হ'ব ? প্ৰমোদ বড়োৱে দিলে ব্যাখ্যা

Sidli constituency By election: চিদলী উপ-নিৰ্বাচনৰ প্ৰাৰ্থী ঘোষণাৰ পিচতে বিপিএফ-ইউপিপিএলৰ বাকযুদ্ধ । চন্দন ব্ৰহ্মকো এৰিব নোখোজে ইউপিপিএলে ।

চিৰাং:চিদলী বিধানসভা সমষ্টিৰ উপ-নিৰ্বাচনত সাংগঠনিক ভেঁটি শক্তিশালী বুলি প্ৰমাণ কৰিবলৈ বিটিআৰৰ দুই প্ৰধান দল ইউপিপিএল আৰু বিপিএফৰ মাজত চলিছে যুঁজ । আগন্তুক বিধানসভা নিৰ্বাচনৰ পূৰ্বে বিটিআৰত ছেমিফাইনেলত অৱতীৰ্ণ হোৱা দল দুটাই নিজৰ নিজৰ প্ৰাৰ্থী ঘোষণা কৰাৰ পিচতেই দলতেই আৰম্ভ হৈছে বিদ্ৰোহ । ইউপিএলৰ টিকট পোৱাৰ আশা কৰি বিফল হোৱাত চন্দন ব্ৰহ্মই নিৰ্দলীয় হিচাপে প্ৰতিদ্বন্দ্বিতা কৰিবলৈ ওলোৱাৰ পিচতেই মুখ খুলিলে বিটিআৰৰ মুখ্য় কাৰ্যবাহী সদস্য় প্ৰমোদ বড়োৱে ।

এতিয়া দুই দলৰ শীৰ্ষ নেতৃত্বৰ বাকযুদ্ধ তুংগত উঠিছে । সোমবাৰে প্ৰাৰ্থীৰ নাম ঘোষণা কৰিয়েই বিপিএফ দলৰ মুৰব্বী হাগ্ৰামা মহিলাৰীয়ে কয় যে "প্ৰমোদ বড়ো হাটাও, বিটিচি বাচাও" ইচ্যু লৈ ভোটাৰ ৰাইজৰ মাজত যাব বিপিএফ । ইয়াৰ বিপৰীতে দীৰ্ঘদিনৰ উৎকণ্ঠাৰ অন্ত পেলাই দলৰ চিৰাং জিলা সভাপতি নিৰ্মল কুমাৰ ব্ৰহ্মক ইউপিপিএলে দলীয় প্ৰাৰ্থিত্ব প্ৰদান কৰাৰ পিছত মঙলবাৰে সন্ধিয়া আয়োজিত এক সংবাদমেলত প্ৰমোদ বড়োৱে প্ৰতিক্ৰিয়া প্ৰকাশ কৰে ।

হাগ্ৰামা মহিলাৰীৰ "প্ৰমোদ বড়ো হাটাও, বিটিচি বাচাও" মন্তব্যৰ প্ৰত্য়ুত্তৰত প্ৰমোদ বড়োই কয়, "হাগ্ৰামা মহিলাৰীয়ে বিটিচিত যোৱা সোতৰটা বছৰ ৰাজত্ব কৰি কি কৰিছে সেয়া বিটিচিৰ ৰাইজে জানে । গতিকে ইয়াত নতুকৈ ক'বলৈ একো নাই । বিপিএফ এতিয়া অস্তগামী সূৰ্য ।"

বিপিএফৰ প্ৰাৰ্থী শুদ্ধ বসুমতাৰীক শুভেচ্ছা জনায় প্ৰমোদ বড়োৱে কয়,"যি নিৰ্বাচনেই নহওক কিয় বিপিএফ পৰাজিত হ'ব । অনাগত দিনতো নিৰ্বাচনত বিপিএফ দল পৰাজিত হৈয়ে থাকিব । মোক এজনে স্ক্ৰীণ শ্বট দিছে য'ত আছে হাগ্ৰামা মহিলাৰীয়ে কৈছে প্ৰমোদ বড়ো হাটাও অভিযান লৈ ৰাইজৰ ওচৰত যাব । যোৱা ১৭টা বছৰত ৰাইজে দুৰ্নীতি, হত্যা, হিংসা, অপশাসনৰ এক অতিষ্ঠ পৰিৱেশত আছিল ৰাইজ । আজি শান্তি চুক্তিমতে হাগ্ৰামাৰ পৰা ৰাইজ ৰক্ষা পৰিছে । আজি শান্তি প্ৰতিষ্ঠা হ'ল ।"

কিদৰে ক্ষমা খুজিব সেই চিন্তা কৰক হাগ্ৰামাই

বিটিআৰৰ প্ৰধানগৰাকীয়ে পুনৰ কয়, "এই সময়ত হাগ্ৰামা মহিলাৰীয়ে বিটিআৰৰ ৩৫ লাখ লোকক আগুৱাই নিয়াৰ কথা চিন্তা কৰিব লাগিছিল । ১৭ বছৰে কৰা ভুলৰ শুধৰণি কি দৰে কৰিব, ৰাইজৰ ওচৰত কিদৰে ক্ষমা খুজিব সেই চিন্তা কৰক হাগ্ৰামাই । প্ৰমোদ বড়ো হাছাও এজেণ্ডাই তেওঁক খুব এটা উপকৃত নকৰিব । কাৰণ মই তেনে কোনো ভুল কাম কৰা নাই যে ৰাইজে মোৰ বিৰুদ্ধে ভাবিব লাগিব । কিন্তু আমি তেওঁক লৈ বহু কথা ক'ব পাৰো । এই কথাবোৰৰ পৰা বুজা যায় হাগ্ৰামা মহিলাৰী ভীতিগ্ৰস্ত হৈছে, দিশাহাৰা হৈছে তাকে প্ৰতিপন্ন কৰে ।"

তেওঁ পুনৰ কয়, "এতিয়া হাগ্ৰামা এণ্ড কোম্পেনীক মাথোঁ পাৱাৰহে লাগে । ৰাইজৰ সমস্যাৰ প্ৰতি পিঠি দি ১৭ বছৰ পাৰ কৰিছিল এতিয়া আমাৰ কামবোৰ দেখি হতাশ হৈছে ।" সংবাদ মেলত বিটিআৰৰ মুখ্য প্ৰমোদ বড়োৱে কয়, "এইটো উপ-নিৰ্বাচন আমাৰ কাৰণে এটা ভাল পৰিৱেশ হৈ আছে । ইউপিপিএলৰ জেষ্ঠ নেতা নিৰ্মল ব্ৰহ্মক চিদলীৰ প্ৰাৰ্থী হিছাপে প্ৰক্ষেপ কৰা হৈছে ।’’

মুখ্য়মন্ত্ৰীয়ে চলাব প্ৰচাৰ :

এতিয়া চিদলী সমষ্টিৰ আধীনত থকা ৫টা পৰিষদী‌য় সমষ্টিৰ নেতৃত্বৰ বৈঠক অনুষ্ঠিত হয় । এই বৈঠক দলৰ অগ্ৰগতিৰ খতিয়ান লোৱাৰ বাবে হয় বুলিও তেওঁ কয় । প্ৰমোদ বড়োই লগতে মুখ্যমন্ত্ৰীৰ নিৰ্বাচনী প্ৰচাৰ সন্দৰ্ভত কয়, "তেখেত এতিয়া কেৱল অসমৰ মুখ্যমন্ত্ৰী নহয়, সৰ্বভাৰতীয় এজন নেতা । ভাৰতৰ অন্য ৰাজ্যৰ নিৰ্বাচনী প্ৰচাৰতো যাবলগীয়া হৈছে । দলে ঝাৰখণ্ডৰ দায়িত্ব দিছে । তাৰ পিৰতো চিদলী আৰু বঙাইগাঁৱৰ নিৰ্বাচনী প্ৰচাৰ সভাত অংশগ্ৰহণ কৰিব । মই অনুৰোধ জনাইছো চিদলীৰ দুখন সভাৰ বাবে । বহুনেতা মন্ত্ৰীও আহিব ।" এই নিৰ্বাচনত খুব এটা প্ৰতিদ্বন্দিতা নহ'ব বুলিও কয় প্ৰমোদ বড়োৱে ।

চন্দন ব্ৰহ্ম ৰাজনৈতিকভাৱে দক্ষ নেতা

প্ৰাক্তন মন্ত্ৰী চন্দন ব্ৰহ্ম সন্দৰ্ভত বিটিআৰ প্ৰধান প্ৰমোদ বড়োই কয়, "সন্মানীয় চন্দন ব্ৰহ্ম ৰাজনৈতিকভাৱে দক্ষ নেতা । আমি আশা কৰিছো তেওঁ দলীয় নীতি-নিৰ্দেশনা মতে কাম কৰিব । বিপিএফ দল ত্যাগ কৰি আমাৰ ইউপিপিএলত যোগদান কৰিছিল । আমি তেওঁক শ্ৰদ্ধা কৰো । প্ৰাৰ্থী বাছনি আমাৰ বিশেষ কমিটীয়ে বহু চালিজাৰি চাইহে কৰিছে । গতিকে আমাৰ বিশ্বাস চন্দন ব্ৰহ্মই চালি জাৰি চাইহে সিদ্ধান্ত ল'ব । চন্দন ব্ৰহ্মৰ বিচক্ষণতা, অভিজ্ঞতাৰ প্ৰতি লক্ষ্য কৰি আমাৰ জেষ্ঠ কিছু লোকৰ উপদেশ মতে তেওঁক বিটিআৰ চৰকাৰৰ উপদেষ্টা নিয়োগ কৰা হৈছে । তেওঁ আজিৰ তাৰিখতো ইউপিপিএলৰ সদ্য হৈ আছে । "

লগতে পঢ়ক:উপ-নিৰ্বাচন: চিদলী সমষ্টিৰ প্ৰাৰ্থী ঘোষণা ইউ পি পি এল আৰু বি পি এফৰ