গুৱাহাটী, ১১ জুন: বিগত কিছু মাহ ধৰি সমূলি নিস্ক্ৰিয় হৈ থকা কংগ্ৰেছৰ বিধায়ক ভৰত চন্দ্ৰ নৰহক মঙলবাৰে হঠাৎ কংগ্ৰেছৰ সভাত দেখা যায় । ধুবুৰী লোকসভা সমষ্টিৰ পৰা অভিলেখ সংখ্যক ভোটত জয়লাভ কৰা ৰকিবুল হুছেইনৰ বিদায় সম্বৰ্ধনা অনুষ্ঠানত হঠাৎ আহি উপস্থিত হয় ভৰত নৰহ। বিধায়ক পদ তথা কংগ্ৰেছ বিধায়িনী দলৰ উপ-দলপতি পদৰ পৰা পদত্যাগ কৰা ৰকিবুল হুছেইনক বিদায় জনাবলৈ অসম বিধানসভাত থকা কংগ্ৰেছ বিধায়িনী দলৰ কক্ষত আজি এক সভা অনুষ্ঠিত কৰা হৈছিল । এই সভাত সক্ৰিয়ভাৱে উপস্থিত থকা দেখা গ'ল ভৰত নৰহক ।
উল্লেখ্য যে, ভৰত নৰহৰ পত্নী ৰাণী নৰহে লখিমপুৰ সমষ্টিত টিকট লাভৰ পৰা বঞ্চিত হোৱাৰ বাবেই প্ৰদেশ কংগ্ৰেছৰ মিডিয়া কোষৰ পৰা হঠাতে পদত্যাগ কৰিছিল নাওবৈচা সমষ্টিৰ বিধায়ক ভৰত নৰহে । এই সন্দৰ্ভত তেওঁ প্ৰদেশ কংগ্ৰেছৰ সভাপতি ভূপেন বৰালৈ প্ৰেৰণ কৰিছিল পদত্যাগ পত্ৰ । অৱশ্যে পদত্যাগ পত্ৰত ভৰত নৰহে মিডিয়া বিভাগৰ অধ্যক্ষ পদ ত্যাগ কৰাৰ কোনো কাৰণ উল্লেখ কৰা নাছিল ।
মন কৰিবলগীয়া যে, নিৰ্বাচনৰ সময়ত মিডিয়া বিভাগটোৰ ভূমিকা আৰু গুৰুত্ব যথেষ্ট বেছি । কিন্তু লোকসভা নিৰ্বাচনৰ প্ৰাকক্ষণত হঠাতে অধ্যক্ষ পদ ত্যাগ কৰি মিডিয়া বিভাগৰ পৰা ভৰত নৰহ আঁতৰি যোৱা বিষয়টোৱে প্ৰদেশ কংগ্ৰেছত জোকাৰণিৰ সৃষ্টি কৰিছিল ।
লখিমপুৰ সমষ্টিৰ প্ৰাৰ্থিত্বৰ দৌৰত আছিল দুবাৰৰ সাংসদ ৰাণী নৰহ আৰু নতুনকৈ বিজেপিৰ পৰা আহি কংগ্ৰেছত যোগদান কৰা উদয় শংকৰ হাজৰিকা । এফালে আছিল ৰাণী নৰহৰ দিল্লীৰ ৰাষ্ট্ৰীয় নেতৃত্বৰ ওচৰত প্ৰৱল প্ৰতাপ আৰু আনফালে প্ৰদেশ কংগ্ৰেছৰ নেতৃত্বৰ প্ৰাৰ্থী আছিল উদয় শংকৰ হাজৰিকা । যাৰ বাবে লখিমপুৰৰ প্ৰাৰ্থী ঘোষণাত যথেষ্ট পলম হৈছিল কংগ্ৰছে নেতৃত্বৰ ।