হিমন্ত বিশ্ব শৰ্মাৰ আচৰণৰ বাবেই অসমতো বাংলাদেশৰ দৰে অৱস্থা হ’ব: অশোক শৰ্মা - Ashok Sarma to join Congress

Ashok Sarma: শুকুৰবাৰে অনেক জল্পনা-কল্পনাৰ অন্তত কংগ্ৰেছত যোগ দিব সদ্যবিজেপি ত্যাগী নেতা অশোক শৰ্মাই ৷ কংগ্ৰেছত যোগদানৰ পূৰ্বেই মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ব্যাপক ক্ষোভ প্ৰকাশ নেতাগৰাকীৰ ৷

নলবাৰী, ৮ আগষ্ট:ৰাজনৈতিক জীৱনত তীব্ৰ মানসিক হেঁচা আৰু সংঘাতৰ অৱসান ঘটাই কাইলৈ অৰ্থাৎ শুকুৰবাৰে নতুন দলত যোগদান কৰিব জ্যেষ্ঠ আৰ এছ এছ নেতা তথা প্ৰাক্তন বিজেপি বিধায়ক অশোক শৰ্মাই । এসময়ত হিন্দুত্ববাদী আদৰ্শেৰে ৰাজনৈতিক জীৱনত খোজ দিয়া নলবাৰীৰ প্ৰাক্তন বিধায়ক অশোক শৰ্মাৰ পথ সলনি হ’ব ৷ নতুন পথত খোজ দিয়াৰ পূৰ্বৰ দিনটোত মানসিক শান্তিৰ উদ্দেশ্যে অশোক শৰ্মাই নিজৰ খেতিপথাৰত সময় কটায় ।

সাংবাদিকৰে হোৱা বাৰ্তালাপত জ্যেষ্ঠ ৰাজনৈতিক নেতাগৰাকীয়ে এক অস্থিৰ অৱস্থাৰ পৰা উদ্ধাৰ হোৱাৰ লগতে বাৰে বাৰে অপমানিত হৈ থকাৰ পৰা নিজক উদ্ধাৰৰ বাবে বিজেপি দল ত্যাগ কৰা বুলি কয় । ‘‘তীব্ৰ মানসিক যন্ত্ৰণাৰ অন্ততহে মই মোৰ সঠিক সিদ্ধান্ত লৈছো । তাৰ বাবে মানসিকভাবে সম্পূৰ্ণ সাজু হৈ কংগ্ৰেছ দলত যোগদান কৰিব ওলাইছো’’ বুলিও দুখ প্ৰকাশ কৰে অশোক শৰ্মাই ।

‘‘মই যি কথা দিছো তাত আৰু আধাতেই একো সিদ্ধান্ত নলওঁ । কংগ্ৰেছক কথা দিছো । কংগ্ৰেছত যোগদান কৰিম বুলি সদৰী কৰি বিজেপিৰ ঘৰখনত অপমানিত হ’বলৈ আৰু নাযাও ।’’ তেওঁ কয় ৷

উল্লেখযোগ্য যে নলবাৰীৰ ৰাজীৱ ভৱনত কাইলৈ ভাৰত ত্যাগ আন্দোলন দিৱস পালন কৰিব কংগ্ৰেছে । উক্ত কাৰ্যসূচীতেই কংগ্ৰেছ দলত যোগদান কৰিব সদ্য বিজেপিত্যাগী অশোক শৰ্মাই । আনহাতে উক্ত যোগদান কাৰ্যসূচীত উপস্থিত থাকিব অসম প্ৰদেশ কংগ্ৰেছ কমিটীৰ সভাপতি ভূপেন বৰা, সাংসদ গৌৰৱ গগৈ, সাংসদ ৰকিবুল হুছেইন, প্ৰদ্যুৎ বৰদলৈ আৰু বহু নেতা-কৰ্মী ।

ইপিনে বিজেপি ত্যাগ কৰাৰ পিচতে দুদিন পূৰ্বে খুমটাই সমষ্টিৰ বিধায়ক মৃণাল শইকীয়া অশোক শৰ্মাৰ ঘৰলৈ আহিছিল ৷ এই সন্দৰ্ভত অশোক শৰ্মাই কয়, ‘‘পূৰ্বৰ পৰা ভাল সম্পৰ্ক আছিল মৃণাল শইকীয়া আৰু মোৰ । যুৱ মৰ্চা একেলগে কৰিছিলো আমি । সতীৰ্থৰ বিদায় বেলাত আন এজন সতীৰ্থক মাত কথা দিবলৈ অহাটো সু-ৰাজনৈতিক পৰম্পৰা ।’’ লগতে মৃণাল শইকীয়াই শেষ সময়ত ঘৰলৈ আহি খবৰ লোৱাটো একপ্ৰকাৰ মুখ্যমন্ত্ৰীৰ চাতুৰি হ’ব পাৰে বুলিও সন্দেহ প্ৰকাশ কৰে অশোক শৰ্মাই ।

আনহাতে বৰ্তমান বিজেপি মুখ্যমন্ত্ৰী হিমন্ত বিশ্ব শৰ্মাই অসমখনক নিজৰ পৈতৃক সম্পত্তি বুলি ভাবি একনায়কত্ববাদী শাসন চলাইছে বুলি কটাক্ষ অশোক শৰ্মাৰ । তেওঁ কয়, ‘‘ধাৰ কৰি কৰি ৰাজ্য চলাই আছে মুখ্যমন্ত্ৰীয়ে । এনে ৰাজনীতিত লাহে লাহে ৰাইজে যেতিয়া জাগ্ৰত হ’ব তেতিয়া বাংলাদেশৰ দৰে অসমতো একেই অৱস্থা হ’ব ।’’ সকলোৱে এদিন দল এৰি আহিব বুলিও মন্তব্য অশোক শৰ্মাৰ ।

তেওঁ পুনৰ কয়, ‘‘কেৱল হিন্দু-মুছলমান বুলি কৈ সমাজক বিভাজিত কৰিছে মুখ্যমন্ত্ৰী হিমন্ত বিশ্ব শৰ্মাই ।’’ মুখ্যমন্ত্ৰীয়ে ২০৪১ ত অসমতো মুছলমানৰ নেতৃত্বত শাসন চলিব বুলি কৰা মন্তব্যৰ প্ৰতিক্ৰিয়া আগবঢ়ায় অশোক শৰ্মাই । যদি মুখ্যমন্ত্ৰীৰ প্ৰতিৰোধ কৰাৰ ক্ষমতাই নাই তেনেহ’লে কিয় এনেকুৱা মন্তব্য কৰিছে মুখ্যমন্ত্ৰীয়ে তাক লৈ প্ৰশ্ন উত্থাপন কৰে অশোক শৰ্মাই ।

আনহাতে মুখ্যমন্ত্ৰীৰ এই বক্তব্যক কোনো হিন্দু মানুহে সমৰ্থন নকৰে বুলি সদৰী কৰি কেৱল নিজৰ ৰাজনৈতিক মুনাফাৰ বাবেহে মুখ্যমন্ত্ৰীয়ে এনেকুৱা সাম্প্ৰদায়িক মন্তব্য কৰি আছে বুলি তেওঁ কয় । কেৱল কৌশলেৰে মুখ্যমন্ত্ৰীয়ে ৰাইজৰ পৰা কৰ সংগ্ৰহ কৰি ধাৰৰ ওপৰত ধাৰেৰে ৰাজ্য চলাই আছে । এই ব্যৱস্থা যেতিয়া ৰাইজে গম পাব তেতিয়া সেকা দিব বুলিও মন্তব্য কৰে অশোক শৰ্মাই ।

লগতে পঢ়ক:বিদ্ৰোহী বিজেপি নেতা অশোক শৰ্মাৰ পদত্যাগৰ পাচতে দলত আৰম্ভ প্ৰলোভনৰ ৰাজনীতি ! - Ashok Sharma to quit BJP