গুৱাহাটী:অসমত অহা ১৩ নৱেম্বৰত অনুষ্ঠিত হ’বলগীয়া বিধানসভা উপ-নিৰ্বাচনৰ পূৰ্বেই বিজেপি বিৰোধী কংগ্ৰেছ নেতৃত্বাধীন বিৰোধী ঐক্য অচল হোৱাৰ দিশে আগবাঢ়িছে । উপ-নিৰ্বাচন হ’বলগীয়া ৫ খন আসনৰ ৪ খন আসনত কংগ্ৰেছে নিজা প্ৰাৰ্থিত্ব ঘোষণা কৰিছে ৷ মাত্ৰ ঘোষণা কৰা নাই বিহালী সমষ্টিৰ প্ৰাৰ্থী ৷
বিহালী বিধানসভা সমষ্টিক কেন্দ্ৰ কৰি উপ-নিৰ্বাচনী কৌশল সন্দৰ্ভত কংগ্ৰেছ নেতা গৌৰৱ গগৈ আৰু অসম কংগ্ৰেছৰ সভাপতি ভূপেন বৰাৰ মাজত সংঘাতে অসমৰ ৰাজনীতিত খলকনি তুলিছে ৷ অচল হোৱাৰ উপক্ৰম ঘটিছে বিৰোধীৰ ঐক্যমঞ্চ । প্ৰদেশ কংগ্ৰেছৰ সভাপতি ভূপেন বৰাই বিৰোধীৰ উমৈহতীয়া মঞ্চ ’অসম সন্মিলিত মৰ্চা’ক সন্তুষ্ট কৰিবলৈ মিত্ৰ দল চিপিআইএমএলক বিহালী আসন দিবলৈ আগ্ৰহ প্ৰকাশ কৰিছে ৷ ইয়াৰ বিপৰীতে সাংসদ গৌৰৱ গগৈয়ে বিচাৰিছে কংগ্ৰেছে বিহালী নিজৰ প্ৰাৰ্থী প্ৰক্ষেপ কৰক । কিন্তু যদিহে বিহালীৰ পৰা কংগ্ৰেছৰ প্ৰাৰ্থীক প্ৰক্ষেপ কৰা হয় তেন্তে বিৰোধীৰ ঐক্য অচল হোৱাৰ সম্ভাৱনা প্ৰকট হৈ পৰিছে ।
বিহালীক লৈ বিৰোধীৰ মাজত সংঘাত কিয় ?
২০১৬ৰ পৰা অসমত শাসনৰ গাদীত থকা বিজেপিক প্ৰতিহত কৰাৰ লক্ষ্যৰে কংগ্ৰেছৰ নেতৃত্বত ১৮ টাকৈ বিৰোধী ৰাজনৈতিক দলৰ উমৈহতীয়া মঞ্চ হ’ল অসম সন্মিলিত মৰ্চা ৷ লোকসভা নিৰ্বাচনৰ পাছত ২০২৬ৰ অসমৰ বিধানসভা নিৰ্বাচনলৈকে ঐক্যবদ্ধ হৈ থকাৰ সংকল্পৰে অধিক সক্ৰিয় হৈছিল অসম সন্মিলিত মৰ্চা চমুকৈ 'অসম' । উপ- নিৰ্বাচন হ’বলগীয়া বিহালী সমষ্টিক কেন্দ্ৰ কৰি 'অসম'ৰ ভংগ হোৱাৰ উপক্ৰম হৈছে । ইয়াৰ কাৰণ হৈছে বিহালী সমষ্টিক লৈ কংগ্ৰেছৰ দুটা শিবিৰৰ বিপৰীতমুখী স্থিতি । বঙাইগাঁও, চামগুৰি, চিদলী আৰু ধলাইত 'অসম'ৰ সমৰ্থনত কংগ্ৰেছে নিজৰ প্ৰাৰ্থী ঘোষণা কৰিছে ৷ বিৰোধীৰ মিত্ৰ দল সমূহেও সন্মতি প্ৰকাশ কৰিছে এই চাৰি সমষ্টিত । কিন্তু ঘোষণা কৰিব পৰা নাই বিহালী সমষ্টিৰ প্ৰাৰ্থী ৷
চি পি আই এম এলক বিহালী আসন এৰি দিয়াৰ বাবে 'সন্মিলিত মৰ্চা’ৰ আন সদস্য দলসমূহৰ ফালৰ পৰা কংগ্ৰেছলৈ প্ৰস্তাৱ দিছিল । কংগ্ৰেছৰ ৰাষ্ট্ৰীয় সাধাৰণ সম্পাদক তথা অসমৰ তত্বাৱধায়ক জিতেন্দ্ৰ সিঙৰ উপস্থিতিত গুৱাহাটীত 'অসম'ৰ এখন বৈঠকত গঠন কৰা এখন সমিতিয়ে বিহালী সমষ্টিৰ বাবে প্ৰাৰ্থী বাচনি কৰি নাম প্ৰেৰণ কৰিছে কংগ্ৰেছ হাইকমাণ্ডলৈ । সমিতিখনে বিহালীৰ বাবে চি পি আই এম এলৰ বিবেক দাসৰ নাম প্ৰস্তাৱ কৰিছে ।
আনহাতে, গৌৰৱ গগৈয়ে বিচাৰে কংগ্ৰেছে নিজে প্ৰাৰ্থী দিয়ক বিহালী সমষ্টিত । কংগ্ৰেছৰ গৌৰৱ গগৈয়ে সদ্য বিজেপি ত্যাগী নেতা জয়ন্ত বৰাক বিহালীত টিকট দিয়াৰ বাবে দিল্লীত হাইকমাণ্ডক প্ৰস্তাৱ আগবঢ়াইছে ৷ হাইকমাণ্ডৰ ওচৰত গৌৰৱ গগৈৰ যুক্তি বিহালীত জয়ন্ত বৰা জয়ী হোৱাটো নিশ্চিত ৷ কংগ্ৰেছৰ সূত্ৰ অনুসৰি গৌৰৱ গগৈয়ে ইতিমধ্যে কংগ্ৰেছ অধ্যক্ষ মল্লিকাৰ্জুন খাৰ্গে আৰু ৰাহুল গান্ধীক বিজেপি বাদ দিয়া জয়ন্ত বৰাৰ গণভিত্তি সমষ্টিটোত চিপিআইএমএলৰ প্ৰাৰ্থীগৰাকীতকৈ বহু বেছি বুলি যুক্তি প্ৰদৰ্শন কৰিছে । সেয়ে মিত্ৰদলক এই সমষ্টিটোত কংগ্ৰেছ বা কংগ্ৰেছৰ মিত্ৰ দলে এতিয়ালৈ প্ৰাৰ্থিত্ব ঘোষণা কৰিব পৰা নাই ।
বিহালী থানবান কৰিবলৈ ওলাইছে 'অসম’ :
বিহালীত কংগ্ৰেছ বা মিত্ৰ আন দল যিয়েই উপ-নিৰ্বাচনৰ বাবে প্ৰাৰ্থিত্ব নিদিয়ক কিয়, কংগ্ৰেছ নেতৃত্বাধীন উমৈহতীয়া মঞ্চখন ভঙাৰ উপক্ৰম হৈছে ৷ বিৰোধীৰ মিত্ৰ দলসমূহে আসনখন এৰি দিবলৈ সন্মত হোৱা নাই । এনে পৰিস্থিতিত অসম সন্মিলিত মৰ্চা ভংগ হোৱাৰ দিশে আগবাঢ়িছে । সন্মিলিত মৰ্চাৰ পৰা প্ৰাৰ্থী দিয়াৰ পৰা বঞ্চিত হ’লে মৰ্চাৰ সভাপতি পদৰ পৰা পদত্যাগ কৰিবলৈ সাজু হৈছে ।