গুৱাহাটী, 21 আগষ্ট : দীঘলীয়া হৈছে ছেপ্টেম্বৰ মাহত মুক্তি পাবলগীয়া অসমীয়া ছবিৰ সংখ্যা । ছেপ্টেম্বৰ মাহত মুক্তি পাব কেইবাখনো নতুন অসমীয়া ছবি । এই ছবিসমূহৰ ভিতৰত এখন প্ৰত্যাশিত অসমীয়া ছবি হৈছে "ভূত জলকীয়া"। আগন্তুক 27 ছেপ্টেম্বৰত ৰাজ্যৰ প্ৰতিটো ছবিগৃহতে মুক্তি লাভ কৰিব এই নতুন অসমীয়া ছবিখনে । Green Grass Films আৰু DP Entertainment ৰ বেনাৰত নিৰ্মিত এই ছবিখনৰ পৰিচালক চিন্ময় শৰ্মা ।
নতুন অসমীয়া ছবি (Bhoot Jolokia Team) দুজন শিক্ষাৰ্থীৰ এটা যাত্ৰাক কেন্দ্ৰ কৰি ছবিখন নিৰ্মাণ কৰা ছবিখনৰ কাহিনী আৰু পৰিচালনা চিন্ময় শৰ্মাৰ । ছবিখনৰ দুটা মুখ্য চৰিত্ৰত অভিনয় কৰিছে মিণ্টু বৰুৱা আৰু অতনু মহন্তই । তেওঁলোক দুয়োৰে লগতে ছবিখনত অভিনয় কৰিছে প্ৰীতি খাউণ্ড মহন্ত, দ্বীপ কুমাৰ কলিতা, ভায়লিনা বৰদলৈ, অদ্ৰিতা পৰাশৰ, ত্ৰিবেণী গগৈ, বিশাল ওজা, নয়ন বৰদলৈ, জয়শ্ৰী ভূঞা, তৰুলতা দাস, ভূপেন শৰ্মা আদিকে ধৰি কেইবাগৰাকীও অভিনেতা-অভিনেত্ৰীয়ে । ছবিখনৰ দৃশ্যগ্ৰহণ কৰিছে পাপু ডেকাই আৰু শব্দ দেৱজিৎ গায়নৰ ।
লগতে পঢ়ক :লোকেল কুংফুৰ সংলাপ লিখা চি-চাৰ্ট পিন্ধি চাবলৈ যাব পাৰিব লোকেল কুংফু 3 - Local Kung Fu merchandise
ছেপ্টেম্বৰ মাহতে মুক্তি পাবলগীয়া আন দুখন প্ৰত্যাশিত নতুন অসমীয়া ছবি হ’ল "লোকেল কুংফু 3" আৰু "চিকাৰ"। পৰিচালক কেনি বসুমতাৰীৰ কাহিনী আৰু পৰিচালনাত নিৰ্মাণ কৰা ছবিখন মুক্তি পাব ছেপ্টেম্বৰ মাহৰ প্ৰথম সপ্তাহতে । "লোকেল কুংফু 1" আৰু "লোকেল কুংফু 2" ৰ ধাৰাবাহিক সফলতাৰ পিচত আগন্তুক 5 ছেপ্টেম্বৰত অসমৰ ছবিগৃহলৈ আহি আছে "লোকেল কুংফু 3"। লোকেল কুংফু 3 ত পুৰণি চৰিত্ৰসমূহৰ লগতে এইবাৰ চাৰ্লিৰ প্ৰেয়সীৰ চৰিত্ৰত ৰিম্পী দাস, দুলু তানসেনৰ বিগ বছৰ চৰিত্ৰত ৰোহন দাস, ছবিখনৰ নতুন খলনায়কৰ ৰূপত জাভেদ আখটাৰ আৰু ৰুবুল বড়োৱে অভিনয় কৰিব । শেহতীয়াকৈ লোকেল কুংফু 3ৰ ট্ৰেইলাৰ আৰু পোষ্টাৰ মুকলি কৰা হয় ৷
ছেপ্টেম্বৰ মাহৰে 20 তাৰিখে ছবিগৃহলৈ আহিব বহু প্ৰত্যাশিত আন এখন অসমীয়া ছবি "চিকাৰ"। বিগ ফিল্মছ মিডিয়া আৰু ডীক্ৰেটিভ ষ্টুডিঅ' এল এল পি (ইণ্ডিয়া) ৰ বেনাৰত নিৰ্মাণ কৰা ছবিখনত দৰ্শকে আকৌ এবাৰ নতুন ৰূপত দেখিবলৈ পাব নৱ-প্ৰজন্মৰ হাৰ্টথ্ৰৱ জুবিন গাৰ্গক । লগতে অভিনয় কৰিছে বিশিষ্ট অভিনেতা আদিল হুছেইন, সিদ্ধাৰ্থ শৰ্মা, অন্তৰীক্ষ চহৰীয়া, ধ্যানী মহন, যতীন খনিকৰ, সঞ্জীৱ বুঢ়াগোঁহাইকে ধৰি কেইবাগৰাকীও অভিনেতা-অভিনেত্ৰীয়ে । নতুন কনচেপ্টৰ ছবিসমূহৰ জৰিয়তে অসমীয়া চলচিত্ৰ উদ্যোগটোৱে বৰ্তমান সময়ত কাহিনী-বিষয়বস্তুৰ পৰা আৰম্ভ কৰি বহুক্ষেত্ৰতে বহু নতুনত্ব কঢ়িয়াই অনা দেখিবলৈ পোৱা গৈছে ।
লগতে পঢ়ক :লোকেল কুংফু 3 ৰ ট্ৰেইলাৰে উৎকণ্ঠিত কৰি তুলিছে অনুৰাগীক - LOCAL KUNG FU 3 TRAILER
