নিউজ ডেস্ক, 3 জুন : বিগত কিছুসময়ৰে পৰা ভাৰতীয় ক্ৰিকেট তাৰকা হাৰ্দিক পাণ্ডিয়া আৰু ছাৰ্বিয়ান মডেল, অভিনেত্ৰী নাতাশা ষ্টেনক’ভিচৰ বিবাহ বিচ্ছেদৰ খবৰে তোলপাৰ লগাই আছে সংবাদ মাধ্যম ৷ নাতাশাই শেহতীয়াকৈ নিজৰ ইনষ্টাগ্ৰাম একাউণ্টৰ পৰা হাৰ্দিক পাণ্ডিয়াৰ সৈতে থকা ফটোৰ লগতে নিজৰ নামৰ পিচফালে থকা পাণ্ডিয়া উপাধি আঁতৰ কৰা দেখা গৈছিল ৷
আনকি চলিত বৰ্ষৰ আই পি এলৰ সময়তো হাৰ্দিক পাণ্ডিয়াৰ মেচৰ সময়ত কোনোদিনে পত্নীক ষ্টেডিয়ামত উপস্থিত থকা দেখা পোৱা নগৈছিল ৷ যাৰ পিচৰে পৰা অনুৰাগীসকলে হাৰ্দিক-নাতাশাৰ মাজত বিবাহ বিচ্ছেদ হোৱাৰ সম্ভাৱনা ব্যক্ত কৰি উৰাবাতৰিৰ প্ৰচাৰ কৰা দেখা যায় ৷
এই সকলো উৰাবাতৰি নস্যাৎ কৰি নাতাশাই পুনৰ ইনষ্টাগ্ৰামত ক্ৰিকেট তাৰকা স্বামী হাৰ্দিক পাণ্ডিয়াৰ সৈতে থকা নিজৰ ফটো শ্বেয়াৰ কৰিছে ৷
নাতাশা ষ্টেনক’ভিচে বিবাহৰ ছবিবোৰ পুনৰ আপলোড কৰে :
নাতাশা ষ্টেনক’ভিচ আৰু হাৰ্দিক পাণ্ডিয়াই ২০২০ চনৰ ৩১ মে'ত বিবাহপাশত আৱদ্ধ হৈছিল ৷ একে বছৰৰ ৩০ জুলাইত তেওঁলোকৰ প্ৰথমটো সন্তান অগস্ত্যই জন্ম লাভ কৰে ৷ তাৰকা দম্পতীটোৱে 2023 চনৰ 14 ফেব্ৰুৱাৰীত ৰাজস্থানৰ উদয়পুৰত একাংশ ঘনিষ্ঠ বন্ধু আৰু পৰিয়ালৰ উপস্থিতিত সম্পূৰ্ণ ৰীতি-নীতিৰে তেওঁলোকৰ বিবাহৰ অনুষ্ঠানৰ বিশাল আয়োজন কৰিছিল ৷ সম্প্ৰতি নাতাশাই তেওঁলোকৰ বিবাহৰ অনুষ্ঠানৰ ফটোৰ লগতে সুখৰ সময়ৰ কিছু ফটো সামাজিক মাধ্যম ইনষ্টাগ্ৰামত পোষ্ট কৰিছে ৷
বিবাহ বিচ্ছেদৰ উৰাবাতৰি কঢ়িয়াই অনা বিশেষ পোষ্টটো :
"নাতাশা আৰু হাৰ্ডিকৰ বিচ্ছেদ হৈছে ?" শীৰ্ষক পোষ্টটোৱে সামাজিক মাধ্যমত সকলো অনুৰাগীৰে দৃষ্টি আকৰ্ষণ কৰিছিল ৷ সকলোৱে এইটোৱে ভাবিছিল যে, নাতাশাই হাৰ্দিকৰ উপাধি আঁতৰ কৰাটোৱে দুয়োৰে মাজত বিবাহ বিচ্ছেদ হোৱাটোকে সূচাইছে ৷ আনকি চলিত আই পি এলৰ খেলৰ সময়তো মডেল, অভিনেত্ৰীগৰাকী কোনোদিনে ষ্টেডিয়ামত নাছিল উপস্থিত ৷
