নলবাৰী : ৰাজ্যৰ সংগীতাকাশৰ পৰা খহি পৰিল এটি তৰা । উকা হৈ ৰ’ল সাংস্কৃতিক জগতখন । সন্তুৰবাদক তথা বিশিষ্ট সংগীতশিল্পী পংকজ শৰ্মা আৰু নাই । "তোমাৰ মিঠা এই চাৱনিকে...’’ ধৰি ডেৰশতাধিক আধুনিক গীতৰ গীতিকাৰ তথা সুৰকাৰ পংকজ শৰ্মাই বিগত ২০২৩ বৰ্ষৰ পৰা বৃক্কজনিত ৰোগত আক্ৰান্ত হৈ আছিল ৷
পৰিয়ালৰ লোকে বিভিন্ন আৰ্থিক সংকটৰ মাজেৰে পংকজ শৰ্মাৰ চিকিৎসা কৰি আছিল ৷ ইয়াৰ মাজতে চলিত বৰ্ষৰ আগষ্টত তেওঁ হেপাটাইটিছৰ লগতে জণ্ডিছ ৰোগত আক্ৰান্ত হৈ লিভাৰৰ সমস্যাত ভোগে । ইয়াৰ পাছৰে পৰা তেওঁৰ স্বাস্থ্যৰ অৱস্থা আৰু অধিক শোচনীয় হৈ পৰে । বিগত ছয়দিন পূৰ্বে বিশিষ্ট শিল্পীগৰাকীক পত্নীয়ে জি এম চি এইচ(ছুপাৰস্পেচিয়েলিটি)ত ভৰ্তি কৰোৱাই যদিও মঙলবাৰে পুৱতি নিশা তিনি বজাত তেওঁৰ দেহাৱসান ঘটে ।
১৯৬৯ চনৰ ১ অক্টোবৰত বৰভাগৰ বৰকুলহাটীত জন্মগ্ৰহণ কৰা পংকজ শৰ্মা শৈশৱৰ পৰাই সংগীতৰ প্ৰতি আকৰ্ষিত হৈছিল । স্থানীয় বৰভাগ কালাগ উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষাত অৱতীৰ্ণ হোৱাৰ পিছৰে পৰা সংগীতকে মূলমন্ত্ৰ হিচাপে লৈ আৰম্ভ কৰে সাংগীতিক জীৱন । দেশৰ প্ৰখ্যাত সন্তুৰবাদক পণ্ডিত শিৱ কুমাৰ শৰ্মাৰ তত্বাৱধানত সন্তুৰ বাদনৰ প্ৰশিক্ষণ লৈ ১৯৯২ চনৰ পৰা আৰম্ভ কৰে সন্তুৰ বাদনেৰে সাংগীতিক যাত্ৰা ।
| লগতে পঢ়ক :স্তব্ধ হৈ ৰ’ল এটি সাহসী কণ্ঠ : পদ্মশ্ৰী বিৰুবালা ৰাভাৰ দেহাৱসান - Birubala Rabha Passes Away |
সুদীৰ্ঘ সময় গুৱাহাটী মহানগৰীতে সংগীতৰ সাধনা কৰি সন্তুৰবাদক হিচাপে ৰাজ্যুজুৰি খ্যাতি অৰ্জন কৰা পংকজ শৰ্মাই অনাতাঁৰ কেন্দ্ৰ গুৱাহাটীৰ এজন নিয়মীয়া ভজন শিল্পীও আছিল । ইয়াৰোপৰি তেওঁ ডেৰ শতাধিক আধুনিক গীত ৰচনা কৰাৰ লগতে বহু গীতৰ সুৰো কৰিছিল । সন্তুৰ বাদনেৰে পৰিয়াল পোহপাল দিয়া শিল্পীগৰাকীয়ে মহানগৰীৰ ভাৰাঘৰতে কটাইছিল জীৱন ।