চিটাৰা ডেস্ক, 18 মে’ :ব্লকআউট ২০২৪ ৰ তালিকাত আৰু কিছু চেলেব্ৰিটীৰ নাম সংযোজন কৰা হৈছে । শেহতীয়াকৈ প্ৰকাশ পোৱা ‘ব্লকআউট ২০২৪’ৰ তালিকাত আলিয়া ভাট, প্ৰিয়ংকা চোপ্ৰা আৰু বিৰাট কোহলীৰ নাম প্ৰকাশ হৈছিল । এতিয়া শেহতীয়া আপডেট অনুসৰি বলীউডৰ তাৰকা শ্বাহৰুখ খান, দীপিকা পাডুকন আৰু ৰণবীৰ সিঙক ব্লকআউট ২০২৪ৰ তালিকাত অন্তৰ্ভুক্ত কৰা হৈছে । ইয়া উপৰিও হলীউডৰ গায়িক তথা প্ৰিয়ংকা চোপ্ৰাৰ স্বামী নিক জ’নাছৰ নামো অন্তৰ্ভুক্ত কৰা হৈছে এই তালিকাত ।
গাজা সংকটৰ সন্দৰ্ভত মৌন হৈ আছে বহু তাৰকা ৷ মৌনতা অৱলম্বন কৰাৰ ক্ষেত্ৰত যেন চেলেব্ৰিটীসকল একলগ হৈ আছে তেনে অনুমান হয় ৷ শেহতীয়াকৈ প্ৰিয়ংকা চোপ্ৰাৰ স্বামী নিক জ’নাছকো এই তালিকাত অন্তৰ্ভুক্ত কৰা হৈছে য’ত টেইলৰ চুইফ্ট, বিয়ন্স, ড্ৰেক, হেৰী ষ্টাইলছ, আৰিয়ানা গ্ৰেণ্ডে আৰু ‘আইৰন মেন’ অভিনেতা ৰবাৰ্ট ডাউনী জুনিয়ৰৰ নামো আছে ।
‘ব্লকআউট ২০২৪’ জৰিয়তে বহু ছ’চিয়েল মিডিয়া ব্যৱহাৰকাৰীয়ে বহু তাৰকাক সামাজিক মাধ্যমত ব্লক কৰিছে ৷ গাজাৰ ওপৰত ইজৰাইলৰ আক্ৰমণৰ সময়ত পেলেষ্টাইনী জনসাধাৰণৰ দুৰ্দশাৰ প্ৰতি উদাসীন হৈ থকা বুলি তেওঁলোকে বিশ্বাস কৰা চেলেব্ৰিটীসকলক ‘ব্লক’ কৰিছে । শেহতীয়াকৈ BlockoutNow-এ ইয়াৰ ইনষ্টাগ্ৰামত আৰু কিছু চেলেব্ৰিটীৰ নাম প্ৰকাশ কৰিছে, য’ত আছে বলীউডৰ বাদশ্বাহ শ্বাহৰুখ খান, বাজীৰাও মস্তানী দম্পতী দীপিকা পাডুকন-ৰণবীৰ সিঙৰ নাম ।