নতুন দিল্লী :যুদ্ধবিধ্বস্ত ছিৰিয়াৰ পৰা অৱশেষত স্বদেশত উপস্থিত হ'ল ভাৰতীয় নাগৰিকসকল । স্বদেশত ভৰি থৈয়ে ছিৰিয়াৰ ভয়ংকৰ পৰিস্থিতি আৰু তেওঁলোকে সন্মুখীন হোৱা আতংকজনক পৰিস্থিতিৰ কথা বৰ্ণনা কৰিলে ভাৰতীয় নাগৰিকসকলে । তাৰ মাজতে নিৰন্তৰ যোগাযোগত থকা ভাৰতীয় দূতাবাসকো প্ৰশংসা কৰিলে নাগৰিকসকলে ।
উল্লেখ্য যে ছিৰিয়াৰ অস্থিৰতাৰ পিছত ভাৰতীয় নাগৰিকসকলক স্বদেশলৈ ঘূৰাই অনা হৈছে । তাৰ ভিতৰত একাংশ লোকে শনিবাৰে সন্ধিয়া দিল্লী বিমানবন্দৰত উপস্থিত হয় ।
কেনে আছিল ছিৰিয়াৰ অভিজ্ঞতা ?
চণ্ডিগড়ৰ বাসিন্দা তথা অভিযন্তা সুনীল দত্তই তেওঁৰ অভিজ্ঞতাৰ কথা বৰ্ণনা কৰি কয় যে ছিৰিয়াৰ ৰাস্তাত কিছুমান দুষ্টচক্ৰ আছে যিয়ে লোকসকলৰ বস্তু লুণ্ঠন কৰি আছে । তেওঁ কয়, "ই অতি বেয়া পৰিস্থিতি আছিল আৰু জুইৰ দৃশ্য আৰু বোমাবর্ষণৰ শব্দই ইয়াক অধিক বেয়া কৰি তুলিছিল । অৱশ্যে, ভাৰতীয় দূতাবাসে আমাৰ সৈতে নিৰন্তৰ যোগাযোগত আছিল আৰু কৰ্মচাৰীসকলে সুৰক্ষা নিশ্চিত কৰিবলৈ আমাক শান্ত হ'বলৈ কৈছিল ।"
শনিবাৰে ভাৰতত উপস্থিত হোৱা লোকসকলৰ ভিতৰত গ্ৰেটাৰ নয়ডাৰ বাসিন্দা সচিত কাপুৰো আছিল । তেওঁ পৰিস্থিতি সন্দৰ্ভত কয়, "আমি প্ৰায় ৭ মাহ ছিৰিয়াত আছিলো । ৭ ডিচেম্বৰত পৰিস্থিতিৰ অৱনতি ঘটিছিল । আমাক দামাস্কাছ চহৰলৈ স্থানান্তৰিত কৰা হৈছিল আৰু তাৰ পিছত আমি চাৰিওফালে জুই আৰু বোমাবর্ষণ দেখিছিলো । এইটো এক আতংকৰ পৰিস্থিতি আছিল । আমি এখন বিলাসী হোটেলত ১১ জনীয়া দল আছিলো । পৰিস্থিতিৰ অধিক অৱনতি ঘটিছিল । মানুহে ৰাজপথত হাহাকাৰ কৰি আছিল, মানুহৰ বহু সামগ্ৰী ডকাইতিও হৈছিল ।"
কাপুৰে লগতে কয়, "ছিৰিয়াত থকা ভাৰতীয় দূতাবাসে আমাক অতি সুচাৰুৰূপে লেবাননলৈ স্থানান্তৰ কৰিছিল আৰু আমি কোনো সমস্যাৰ সন্মুখীন হোৱা নাছিলো ।" তেওঁ উল্লেখ কৰা মতে লেবাননতো তেওঁলোকৰ থকা আৰু খোৱাৰ সুবিধা অতি ভাল আছিল । তেওঁ স্বদেশলৈ উভতি আহিব বিচৰা ক্ষতিগ্ৰস্ত ভাৰতীয়সকলক আগবঢ়োৱা সহায়ৰ বাবে বৈদেশিক পৰিক্ৰমা মন্ত্ৰালয়ক ধন্যবাদ জ্ঞাপন কৰে ।
শনিবাৰে দিল্লী বিমানবন্দৰত উপস্থিত হোৱা আন এগৰাকী ভাৰতীয় নাগৰিক ৰতন লালে কয়, "মই যোৱা ৫ বছৰ ধৰি ছিৰিয়াত আছো । যেতিয়া পৰিস্থিতি অধিক অৱনতি ঘটিছিল আমাক দামাস্কাছলৈ মাতি অনা হৈছিল আৰু তাত এখন হোটেলত ৰখা হৈছিল । তাৰ পিছত ভিছা দিয়া হৈছিল আৰু আমি পৰৱৰ্তী যাত্ৰাৰ বাবে বিমানবন্দৰলৈ গৈছিলো ।" লালে কয় যে পৰিস্থিতি অতি বেয়া আছিল আৰু তেওঁৰ পৰিয়ালৰ সদস্যসকলে তেওঁক যিকোনো প্ৰকাৰে ঘূৰি আহিবলৈ কৈছিল ।
হাৰিয়ানাৰ গুৰগাঁও জিলাৰ বাসিন্দা চেতন লালে কয় যে তেওঁ যোৱা ১০ বছৰ ধৰি ছিৰিয়াত কাঁচৰ বটল প্ৰস্তুত কৰা কোম্পানীত কাম কৰি আছিল । তেওঁ কয়, "তিনিদিন ধৰি আমাক দামাস্কাছত ৰখা হৈছিল । লেবানীজ আৰু ছিৰিয়াৰ দূতাবাসেও আমাক উভতনি যাত্ৰাত সহায় কৰাৰ ক্ষেত্ৰত যথেষ্ট সহযোগিতা আগবঢ়াইছে ।"
উল্লেখ্য যে ছিৰিয়াৰ পৰিস্থিতিৰ পিছতে একাংশ ভাৰতীয় নাগৰিকে উভতি আহিব বিচাৰিছিল আৰু এই ক্ষেত্ৰত সহায়ৰ বাবে চৰকাৰক আহ্বান জনাইছিল । সেই অনুসৰি ইতিমধ্যে ভাৰতীয়সকলক স্বদেশলৈ ঘূৰাই অনা হৈছে । এই সন্দৰ্ভত শেহতীয়াকৈ বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে কৈছিল, "আমি ছিৰিয়াৰ সকলো ভাৰতীয় নাগৰিকক স্থানান্তৰিত কৰিছো যিসকলে সেই দেশৰ শেহতীয়া পৰিস্থিতিৰ পিছত স্বদেশলৈ উভতি আহিব বিচাৰিছিল । এতিয়ালৈকে ছিৰিয়াৰ পৰা ৭৭ গৰাকী ভাৰতীয় নাগৰিকক স্থানান্তৰ কৰা হৈছে ।"
লগতে পঢ়ক :আছাদ শাসনৰ উৎখাতৰ পিছত ভাৰতৰ ৭৫ জন নাগৰিকক ছিৰিয়াৰ পৰা স্থানান্তৰ - SYRIA UNREST
