নিউজ ডেস্ক, 30 এপ্ৰিল: যোগাযোগ আৰু বৈদ্যুতিক যুদ্ধ বিশেষজ্ঞ এডমিৰেল দিনেশ কুমাৰ ত্ৰিপাঠীয়ে মঙলবাৰে দায়িত্ব গ্ৰহণ কৰে ভাৰতীয় নৌ সেনাৰ মুৰব্বী হিচাপে ৷ আৰ হৰি কুমাৰে অৱসৰ লোৱাৰ পিচত নৌ সেনাৰ 26 তম প্ৰধান হিচাপে দায়িত্বভাৰ গ্ৰহণ কৰে দিনেশ কুমাৰ ত্ৰিপাঠীয়ে ৷ ৰেৱাৰ সৈনিক স্কুলৰ প্ৰাক্তন ছাত্ৰ এডমিৰেল ত্ৰিপাঠী ইয়াৰ পূৰ্বে নৌ সেনাৰ উপ-প্ৰধান হিচাপে কাৰ্যনিৰ্বাহ কৰি আছিল ৷
উল্লেখ্য যে, ১৯৬৪ চনৰ ১৫ মে’ত জন্মগ্ৰহণ কৰা এডমিৰেল ত্ৰিপাঠীক ১৯৮৫ চনৰ ১ জুলাইত ভাৰতীয় নৌসেনাৰ কাৰ্যবাহী শাখাত নিযুক্তি দিয়া হৈছিল । যোগাযোগ আৰু বৈদ্যুতিক যুদ্ধ বিশেষজ্ঞ হিচাপে তেওঁ প্ৰায় 39 বছৰজোৰা এক দীঘলীয়া সেৱা আগবঢ়াই আহিছিল । নৌসেনাৰ উপ-প্ৰধান হিচাপে দায়িত্ব গ্ৰহণ কৰাৰ পূৰ্বে তেওঁ পশ্চিম নৌ সেনা কমাণ্ডৰ ফ্লেগ অফিচাৰ কমাণ্ডিং-ইন-চীফ হিচাপেও কাৰ্যনিৰ্বাহ কৰিছিল ।
তদুপৰি এডমিৰেল ত্ৰিপাঠী ভাৰতীয় নৌ সেনাৰ জাহাজ বিনাশ, কিৰ্চ আৰু ত্ৰিশূলৰো নিয়ন্ত্ৰক আছিল । বিভিন্ন গুৰুত্বপূৰ্ণ অভিযানমূলক আৰু কৰ্মচাৰী নিযুক্তিও অনুষ্ঠিত কৰিছে ৷ যাৰ ভিতৰত অন্তৰ্ভুক্ত আছে ৱেষ্টাৰ্ণ ফ্লীটৰ ফ্লীট অপাৰেচন বিষয়া, নৌ অভিযানৰ সঞ্চালক, মুখ্য সঞ্চালক, নেটৱৰ্ককেন্দ্ৰিক অভিযান আৰু মুখ্য সঞ্চালক, নৌ পৰিকল্পনা আদি ৷