گجرات: وڈودرا میں سات سال میں پہلی بار سوائن فلو کا معاملہ سامنے آیا ہے۔ صحت کے حکام نے یہ اطلاع دی ہے اور بتایا کہ یہ معاملہ ایک حاملہ خاتون میں پیش آیا ہے۔ مریض کا فی الحال وڈودرا کے سرکاری اسپتال میں H3N1 انفلوئنزا کا علاج کیا جارہا ہے۔ دو دن پہلے خاتون کو نزلہ، کھانسی اور تیز بخار کی حالت میں ہسپتال میں داخل کیا گیا تھا۔
اسپتال کے ایک سینئر ڈاکٹر ڈاکٹر اومان بیلم نے میڈیا کے نمائندوں کو بتایا کہ واگھودیا علاقے سے تعلق رکھنے والی 25 سالہ خاتون کو آئیسولیشن وارڈ میں داخل کرایا گیا ہے اور گزشتہ تین دنوں سے اس کا علاج کیا جا رہا ہے۔ وہ 22 ہفتوں کی حاملہ ہے اور اس کی حالت مستحکم ہے۔ انہوں نے کہا کہ اگر وہ تیزی سے صحت یاب ہو جاتی ہے تو اسے دو دن کے بعد ڈسچارج کر دیا جائے گا۔
مزید پڑھیں:
واضح رہے کہ بھارت میں کورونا وبا کے کیسز میں مسلسل ہورہے اضافے کے درمیان اب سوائن فلو کا بھی خدشہ بڑھتا جارہا ہے۔ مدھیہ پردیش کے شیو پوری شہر میں خنزیروں میں بھی گزشتہ دنوں سوائن فلو کا معاملہ سامنے آیا تھا، ویٹرنری ڈپارٹمنٹ میں تعینات ڈپٹی ڈائریکٹر ڈاکٹر ایم سی تموری نے اس معاملے کی تصدیق کرتے ہوئے کہا تھا کہ شہر میں کچھ خنزیروں میں سوائن فلو کے رپورٹس مثبت آئے ہیں۔ جس کے بارے میں ضلع انتظامیہ کو اطلاع دے دی گئی ہے۔ حکومت کی ہدایات کے مطابق اگلا قدم اٹھایا جائے گا۔ اس کے علاوہ انہوں نے کہا تھا کہ انسانوں میں بھی سوائن فلو پھیلنے کا خدشہ ہے، اس لیے احتیاطی تدابیر اختیار کی جانی چاہئے۔
مزید پڑھیں:
