لوک سبھا میں کانگریس کے رہنما اور مغربی بنگال کے مرشدآباد کے بہرامپور سے رکن پارلیمان ادھیررنجن چودھری نے کہا کہ دہلی فرقہ واریت کی آگ میں جل رہی ہے۔امت شاہ اپنی ذمہ داری ادا کرنے میں ناکام رہے ہیں ۔ بڑے پیمانے پر جان و مال کی تباہی ہوئی ہے۔
انہوں نے کہا کہ سیکڑوں بنگالی ورکر غائب ہیں۔ ایسے میں ممتا بنرجی کی ذمہ داری ہے کہ وہ امت شاہ کی میٹنگ کا بائیکاٹ کرتیں۔ لیکن انہوں نے ایسا نہیں کیا ۔
ممتا بنرجی شمالی مشرقی ریاستوں کےوزرائے اعلیٰ کی میٹنگ میں شرکت کیلئے گزشتہ دو دنوں سے بھونیشور میں ہیں۔ انہوں نے مختلف مندروں کا دورہ کیا ہے اور کل امت شاہ کے ساتھ میٹنگ میں شریک ہوئیں ۔ممتا بنرجی اور امت شاہ کی میٹنگ پر بنگال کی اپوزیشن جماعتیں بایاں محاذ اور کانگریس نے سخت اعتراض کیا ہے۔
سی پی ایم کے پولٹ بیورو کے رکن و سابق ممبر پارلیمنٹ محمد سلیم نے کہا کہ ممتا بنرجی ان لوگوں میں سے ہیں جو ہر وقت مظلوموں کے ساتھ کھڑی نہیں ہوتی ہیں ۔سی پی ایم لیڈروں نے کہا ہے کہ ممتا بنرجی دہلی تشدد کی سخت الفاظ میں تنقید کرنے سے گریز کررہی ہیں۔
خیال رہے کہ ائیر پورٹ جاتے ہوئے مغربی بنگال کی وزیر اعلیٰ ممتا بنرجی نے کہا تھا کہ دہلی کے حالات تکلیف دہ ہیں اور خون خرابہ جلد سے جلد بند ہونا چاہیے۔
واضح رہے کہ گزشتہ 24 فروری کو دہلی کے شمال مشرق میں شہریت ترمیمی ایکٹ کی مخالفت اور اس کے حامیوں کے درمیان جھڑپ میں متعدد افراد کی موت ہو ئی تھی۔
