مغربی بنگال کانگریس پردیش کے صدر ادھیر رنجن چودھری نے کہا کہ مغربی بنگال کے اقلیتی طبقے کے لوگ مذہب کے نام پر سیاست کرنے والوں کی کبھی حمایت نہیں کریں گے۔
انہوں نے کہا کہ مغربی بنگال کے مسلمانوں نے ہمیشہ سے ہی سیکولر جماعتوں کی حمایت کی ہے اور مستقبل میں بھی کریں گے۔ حالانکہ اس کے لئے انہیں کئی مرتبہ پریشانیوں کا سامنا کرنا پڑا ہے۔
کانگریس پردیش کے صدر نے کہا کہ بی جے پی، آل انڈیا مجلس اتحاد المسلمین اور فرفرہ شریف کے پیرزادہ عباس صدیقی کی نئی سیاسی جماعت انڈین سیکولر فرنٹ سے کچھ بھی ہونے والا نہیں ہے۔
انہوں نے کہا کہ بنگال کے اقلیتی طبقہ کے لوگ ان پارٹیوں کی کبھی بھی حمایت نہیں کریں گے کیونکہ انہیں پتہ ہے، ان سے لوگوں کو فائدہ کم اور نقصان زیادہ ہوگا۔
ادھیر رنجن چودھری نے کہا کہ ترنمول کانگریس اور بی جے پی ایک ہی سکے کے دو پہلو ہیں۔ اس لیے ان دونوں کو اکھاڑ پھینکنے کی ضرورت ہے۔
یہ بھی پڑھیں: ووٹرلسٹ میں روہنگیا اور بنگلہ دیشیوں کے نام ہونے کا ثبوت نہیں: چیف الیکشن کمشنر
کانگریس کے رہنما ادھیر رنجن چودھری نے کہا کہ اسمبلی انتخابات کے دوران مرکزی فورسز اور مغربی بنگال کی پولیس کو ایک دوسرے سے دور رکھنے کی ضرورت ہے۔
انہوں نے کہا کہ مغربی بنگال کی پولیس مرکزی فورسز کو اسمبلی انتخابات کے دوران گمراہ کر سکتی ہے۔
