مغربی بنگال کی وزیراعلی ممتا بنرجی نے حیدرآباد میں 26 سالہ وٹنری ڈاکٹر کی اجتماعی عصمت دری کے واقعہ کے مد نظر پولیس کے اعلی افسران کو خواتین کے خلاف کسی بھی جرم پر سخت کارروائی کرنے کی ہدایت دی ہے۔
محترمہ بنرجی نے ریاست کے تمام اضلاع کے سینئر پولیس افسران کے ساتھ اعلی سطحی میٹنگ کے دوران کہا کہ خواتین کے خلاف ہونے والے جرائم میں مناسب کارروائی کریں اور اس بات کو یقینی بنائیں کہ خواتین کے خلاف تشدد کا کوئی واقعہ پیش نہ آئے ۔
انہوں نے کہا کہ کسی بھی تھانے میں اگر اس سلسلے میں شکایت آتی ہے تو بغیر کسی تکنیکی چھان بین کے شکایت درج کی جائے ۔
انہوں نے حکام کو فرقہ وارانہ کشیدگی بھڑکانے والے لوگوں کے خلاف سخت کارروائی کرنے کی بھی ہدایت دی ۔ ساتھ ہی انہوں نے پولیس افسران کو آل انڈیا مجلس اتحاد المسلمین کی سرگرمیوں پر نظر رکھنے کو بھی کہا ۔
وزیراعلیٰ نے کہاکہ سماج میں اس طرح کے واقعے رونماہونے سے سماج شرمشار ہے۔ لوگوں میں بیداری لانے کی ضرورت ہے۔ لوگوں میں بیداری آنے کے بعد اس طرح کے واقعے پر قابو پا یاجاسکتاہے۔
ترنمول کانگریس کی سربراہ کاکہنا ہے کہ مرکزی حکومت اس ضمن میں سخت ترین قانون بنانے کی ضرورت ہے۔ تاکہ اس طرح کے واقعے پر جلد سے جلد قابو پایاجاسکے۔
انہوں نے کہاکہ مرکزی حکومت خود ہی اس معاملے میں سیاست کرتی ہے اس لیے وہ قانون بنانے میں ناکام رہی ہے۔ اگر مرکزی حکومت چاہیے تو سخت ترین قانون بنانے میں اسے کسی بھی طرح کی کوئی دشواری پیش نہیں آسکتی ہے۔
واجح رہے کہ گزشتہ ماہ تلنگانہ میں چند شرپسندوں نے ایک خاتون ڈاکٹر کی عصمت دری کرنے کے بعد انہیں بے رحمی سے قتل کردیاتھا۔ اس واقعہ کے بعد پورے ملک میں احتجاج کاسلسلہ جاری ہے۔
