جماعت اسلامی حلقہ مغربی بنگال کی جانب سے ہر سال درگا پوجا کے موقع پر غیرمسلموں میں اسلام کے تئیں موجود غلط فہمیوں کو دور کرنے اور بھائی چارگی کا پیغام دینے کے مقصد کے تحت سمپریتی اسٹال لگایا جاتا ہے۔
کولکتہ میں اس سال بھی جماعت اسلامی کی جانب سے درگا پوجا پنڈالوں کے قریب 150 سمپریتی اسٹال لگائے گئے۔
مغربی بنگال میں ہر سال درگا پوجا بہت ہی تزک و احتشام کے ساتھ منایا جاتا ہے۔ مختلف مذاہب کے لوگ اس تہوار میں شریک ہوتے ہیں۔ بنگالیوں کے لیے درگا پوجا کافی اہمیت کا حامل ہے۔ یہی وجہ ہے کہ درگا پوجا کے دوران سارا کولکاتا شہر روشنی میں ڈوب جاتا ہے۔ پوجا پنڈالوں کو خصوصی طور پر نہایت خوبصورت انداز میں سجایا جاتا ہے جسے دیکھنے کے لیے لاکھوں لوگ دور دراز سے کولکاتا آتے ہیں۔
جماعت اسلامی کی جانب سے درگا پوجا کے دوران غیرمسلم براداران وطن کو بھائی چارے کا پیغام دینے کے مقصد سے سمپریتی اسٹال لگائے جاتے ہیں جس کی ایک اور منشا یہ بھی ہوتی ہے کہ اسلام کے تئیں براداران وطن میں پھیلی غلط فہمیوں کو بھی دور کیا جائے۔
اس سال بھی کولکاتا شہر میں جماعت کی جانب سے 150 سمپریتی اسٹال لگائے گئے۔ ان اسٹال پر موجود جماعت اسلامی رضاکاروں کی جانب سے درگا پوجا میں آنے والے زائرین کےلیے مفت پینے کا پانی اور فرسٹ ایڈ کا انتظام کیا جاتا ہے۔ اس کے علاوہ اسلامی لٹریچر اور کتابچے بھی براداران وطن میں تقسیم کئے جاتے ہیں تاکہ اسلام کے خلاف پھیلی ہوئی غلط فہمیوں کو دور کیا جاسکے۔
جماعت اسلامی حلقہ مغربی بنگال کے سکریٹری شاداب معصوم نے بتایا کہ اس سال ریاست میں پوجا منڈپ کے قریب 150 سے زائد سمپریتی اسٹال لگائے گئے جہاں پینے کا صاف پانی، فرسٹ ایڈ اور سینیٹائزر کا انتظام کیا گیا جبکہ ہزاروں برادران وطن نے ان اسٹالز کا رخ کیا۔
انہوں نے کہا ملک کے موجودہ حالات میں فرقہ وارانہ ہم آہنگی کو ختم کرنے کی کوشش کی جارہی ہے۔ ایسے حالات میں جماعت اسلامی ہند نے اس مہم کو شروع کیا ہے تاکہ آپسی بھائی چارگی میں اضافہ ہو اور لوگ دوسرے کو سمجھ سکے۔
