مغربی بنگال کے ہگلی ضلع کے شری رام پور میں واقع ویلنگٹن جوٹ مل کے مزدوروں نے کام نہ ملنے کی وجہ سے ناراض ہو کر منیجر سمیت دیگر اعلیٰ افسران کے اسٹاف کوارٹر پر حملہ کرکے توڑ پھوڑ کی۔ حملے کے بعد مل میں کشیدگی پھیل گئی۔
ذرائع کے مطابق ویلنگٹن جوٹ مل کے مزدوروں نے کام نہ دینے پر احتجاج کرتے ہوئے اسٹاف کوارٹر پر حملہ کر کے توڑ پھوڑ کی۔
پولیس نے جائے وقوع پر پہنچ کر حالات کو قابو میں کیا۔ اس معاملے میں اب تک کسی کی گرفتاری عمل میں نہیں آئی ہے، جبکہ پوچھ گچھ جاری ہے۔
جوٹ مل کے اسٹاف کوارٹر کے ارد گرد سکیورٹی انتظامات کیے گئے ہیں تاکہ ملازمین پر دوبارہ حملہ نہ ہو پائے۔'
مزدوروں کا کہنا ہے کہ ویلنگٹن جوٹ مل کے بیشتر مزدوروں کو کام نہیں مل رہا ہے۔ مزدوروں کو بیٹھا کر رکھا جاتا ہے۔
انہوں نے کہا کہ جوٹ مل کے افسران کو اس سلسلے میں متعدد بار آگاہ کیا گیا، اس کے باوجود بیشتر مزدوروں کو کام نہیں دیا جارہا ہے۔
اس واقعے کے بعد مزدوروں نے سڑک کی ناکہ بندی کردی جس سے آمد و رفت پوری طرح سے ٹھپ پڑ گئی۔ پولیس نے مزدوروں کو سمجھا کر ناکہ بندی ختم کرائی۔
