اداکارہ سے سیاست داں بنیں ترنمول کی رکن پارلیمنٹ نصرت جہاں نے بالآخر اپنے حمل اور نکھل جین سے رشتے سے متعلق کئی دنوں سے چل رہی قیاس آرائوں پر اپنی خاموشی توڑی۔ انہوں نے ایک بیان جاری کر کے کہا کہ نکھل جین سے ان کی شادی ترکی کے قانون کے مطابق ہوئی تھی تو جس کی بھارت میں کوئی اہمیت نہیں ہے، لہذا طلاق کا سوال ہی پیدا نہیں ہوتا ہے۔
نصرت جہاں نے اس بیان میں نکھل جین پر متعدد الزامات عائد کیے۔ انہوں نے دعویٰ کیا کہ نکھل نے ان کے خاندانی زیورات سمیت دیگر اثاثے غیر قانونی طریقے سے اپنے پاس رکھ لیا ہے۔ انہوں نے نکھل جین پر ان کی رضامندی کے بغیر مختلف بینک اکاؤنٹ سے غلط طریقے سے پیسے نکالنے کا بھی الزام عائد کیا۔
اس موقع پر رکن پارلیمنٹ نصرت جہاں نے اپنے حمل کی خبروں سے متعلق کچھ نہیں کہا۔
واضح رہے کہ گذشتہ کچھ دنوں سے نصرت جہاں کے حمل کی خبریں گردش کررہی ہیں۔ اس حوالے سے نکھل جین نے کہا کہ اگر خبریں سچ ہیں تو وہ اداکارہ کے بچے کے والد نہیں ہیں۔ کیونکہ وہ زیادہ دن ساتھ نہیں رہتے ہیں۔
