مغربی بنگال کی حکمراں جماعت ترنمول کانگریس کے رکن اسمبلی رابندرناتھ بھٹاچاریہ کو کورونا مثبت پایا گیا ہے۔ ریاستی سکریٹریٹ بلڈنگ نبنو نے اس کی اطلاع دیتے ہوئے کہا کہ انہیں نجی ہسپتال میں داخل کرایا گیا ہے۔
ذرائع کے مطابق سینگور سے ترنمول کانگریس کے رکن اسمبلی رابندر ناتھ بھٹاچاریہ کو گزشتہ روز بخار اور سانس لینے میں تکلیف کی شکایت پر ہسپتال میں داخل کرایا گیا تھا۔
ڈاکٹرز کے مشورے کے بعد رکن اسمبلی کو کولکاتا کے ایک نجی ہسپتال میں منتقل کیا گیا۔ رکن اسمبلی ٹیسٹ میں کورونا مثبت پائے گئے ہیں. انہیں آئی سی یو میں رکھا گیا ہے۔
ڈاکٹروں کے مطابق رکن اسمبلی کی طبعیت تشفی بخش ہے۔ اس کے باوجود انہیں علیحدہ رکھا گیا ہے۔ انہوں نے کہا کہ اگلے 48 گھنٹوں کے دوران وہ بالکل صحتیاب ہو جائیں گے۔
واضح رہے کہ مغربی بنگال میں کورونا وائرس کے مریضوں کی تعداد چار لاکھ 52 ہزار سے زائد ہے، اس کے علاوہ اس وباء سے اب تک ساڑھے سات ہزار لوگوں کی موت ہو چکی ہے۔
