ریاست مغربی بنگال میں منعقد ہونے والے اسمبلی انتخابات سے قبل سیاسی جماعتوں کی سرگرمیوں میں زبردست اضافہ ہوا ہے۔ حکمراں جماعت ترنمول کانگریس دل بدل کے کھیل میں ابتدائی نقصان اٹھانے کے باوجود مضبوطی کے ساتھ انتخابی میدان میں کھڑی ہے۔
امت شاہ، پارٹی کے صدر جے پی نڈا سمیت تمام اعلیٰ رہنما ریاست میں بی جے پی کی حکومت بنانے کے لئے ایڑی چوٹی کا زور لگا رہے ہیں۔ کانگریس اور لیفٹ فرنٹ اتحاد نے بھی اپنی کھوئی ہوئی زمین واپس پانے کی کوششیں تیز کردی ہے۔ سی پی آئی ایم کے سرکردہ رہنما محمد سلیم نے مالدہ ضلع میں نامہ نگاروں سے گفتگو کرتے ہوئے کہا کہ ترنمول کانگریس کی وجہ سے ہی بی جے پی کو مضبوطی ملی ہے۔
انہوں نے کہا کہ ترنمول کانگریس اور بی جے پی کو شکست دینے کے لئے وہ ایک مضبوط اتحاد قائم کرنے کی کوشش کررہے ہیں اور امید ہے فروری میں یہ کام بھی پورا ہو جائے گا۔ محمد سلیم نے کہا کہ مغربی بنگال کے عوام بھی حکمراں جماعت ترنمول کانگریس اور بی جے پی سے اب تھک چکے ہیں اور اب انہیں ایک مضبوط متبادل کی تلاش ہے۔ واضح رہے کہ سی پی آئی ایم پولیٹ بیورو کے رکن محمد سلیم ان دنوں مالدہ ضلع کے دورے پر ہیں۔
