مغربی بنگال میں آئندہ 22 اپریل کو ہونے والے چھٹے مرحلے کی ووٹنگ کی تیاریوں کے درمیان سیاسی جماعتوں کے مابین جھڑپوں کا سلسلہ جاری ہے۔
اطلاعات کے مطابق مغربی بنگال میں ضلع مرشدآباد کے ہریر پاڑی میں ترنمول کانگریس اور کانگریس کے حامیوں کے درمیان تصادم میں ایک شخص کی موت ہوگئی جبکہ متعدد افراد زخمی ہوگئے۔
ترنمول کانگریس اور کانگریس کے حامیوں نے ایک دوسرے پر فائرنگ کی اور بموں سے حملہ کیا، جس سے علاقے میں کشیدگی پھیل گئی.اس واقعے میں ایک شخص کی موت ہوگئی، جو کانگریس کا سرگرم رہنما بتایا جارہا ہے۔
واقعے کے بعد جائے وقوع پر پہنچی پولیس نے حالات کو قابو میں کیا اور ابتدائی تفتیش کے بعد زخمیوں کو ضلع صدر ہسپتال میں داخل کرایا۔
اس تعلق سے پولیس نے بتایا کہ گروہی تصادم میں قاسم علی شیخ نام کے ایک شخص کی موت ہو گئی ہے. لاش کو پوسٹ مارٹم کے لئے ہسپتال بھیج دیا گیا ہے۔
فی الحال اس معاملے میں ملوث لوگوں کو پولیس گرفتار کرکے پوچھ تاچھ کررہی ہے۔
