محمڈن اسپورٹنگ کلب 'ڈورنڈ کپ 2021' کے فائنل میں

محمڈن اسپورٹنگ نے ایف سی بنگلورو یونائٹیڈ کو پہلے سیمی فائنل کے دلچسپ اور سنسنی خیز مقابلے میں 2-4 سے شکست دے کر 'ڈورنڈ کپ 2021' کے فائنل میں پہنچ گئی ہے۔

مغربی بنگال کے شمالی 24 پرگنہ کے بدھان نگر میں واقع سالٹ لیک اسٹیڈیم میں' ڈورنڈ کپ 2021' کے پہلے سیمی فائنل میں میزبان ٹیم محمڈن اسپورٹنگ اور ایف سی بنگلورو یونائٹیڈ کی ٹیمیں آمنے سامنے ہوئیں۔

محمڈن اسپورٹنگ اور ایف سی بنگلورو یونائٹیڈ کی ٹیموں نے جارحانہ انداز میں کھیل کا مظاہرہ کرتے ہوئے اپنی حریف ٹیم پر دباؤ بنانے کی بھر پور کوشش کی۔

کھیل کے محض 36 ویں سیکنڈ پر پیڈرو مانجی نے گول کرکے ایف سی بنگلورو یونائٹیڈ کو ایک صفر کی سبقت دلا دی۔ مگر کھیل کے آٹھویں منٹ پر مارکوس جوزف نے شاندار کھیل کا مظاہرہ کرتے ہوئے گول کیا اور محمڈن اسپورٹنگ کو 1۔1 کی برابری پر لاکھڑا کر دیا۔

محمڈن اسپورٹنگ کلب ڈورنڈ کپ 2021 کے فائنل میں

کھیل کے 38 ویں منٹ پر فیصل علی نے گول کرکے اپنی ٹیم محمڈن اسپورٹنگ کو 1-2 سے آگے کر دیا۔ پہلے ہاف کے اختتام تک دونوں ٹیموں کے درمیان دلچسپ اور سنسنی خیز مقابلہ دیکھنے کو ملا اور میچ کا اسکور 1-2 رہا۔ دوسرے ہاف میں بھی دونوں ٹیموں کے درمیان برتری کی جنگ جاری رہی۔ شروعات سے ہی دونوں جانب سے پے در پے حملے ہوئے۔ کھیل کے 78 ویں منٹ پر کنگسوک دیب ناتھ نے گول کرکے ایف سی بنگلورو یونائٹیڈ کو 2-2 کی برابری پر لاکھڑا کر دیا۔ کھیل کے مقررہ وقت تک دونوں ٹیموں کے درمیان ایک دوسرے پر سبقت حاصل کرنے کی جنگ جاری رہی۔

کھیل کے ایکسڑا منٹ میں ایف سی بنگلورو یونائٹیڈ کو اس وقت زوردار جھٹکا لگا جب غیر ملکی کھلاڑی پیڈرو منجی کو ریڈ کارڈ دے کر میدان سے باہر کر دیا گیا۔

محمڈن اسپورٹنگ نے حریف ٹیم کے ایک کھلاڑی کم ہونے کا فائدہ اٹھایا اور 106ویں منٹ پر برنڈن وین لال رنڈیکا کے گول کی بدولت ایک بار بار پھر 2۔3 کی سبقت حاصل کر لی۔

کھیل کے ایکسڑا ٹائم کے دوسرے ہاف کے 109 ویں منٹ پر اسٹینوویک نے پنالٹی کو گول میں تبدیل کرکے محمڈن اسپورٹنگ کو نہ صرف 2-4 کی سبقت دلائی بلکہ 130 ویں ڈورنڈ کپ 2021 کے فائنل کا ٹکٹ بھی کنفرم کر دیا۔
یہ بھی پڑھیں: معین علی کا ٹیسٹ کرکٹ سے سبکدوشی کا اعلان
میزبان ٹیم محمڈن اسپورٹنگ کی جیت کے ساتھ ٹورنامنٹ کے فائنل میں جگہ بنانے پر شیدائیوں نے سالٹ لیک اسٹیڈیم کے باہر جم کر جشن منایا۔